08.09.2026 | 10:31
Պապոյանը Դուբայում քննարկել է հայկական կառուցապատման ոլորտը միջազգային հարթակներում ներկայացնելու հնարավորությունները
Լոնդոնն ու Բեռլինը համատեղ նոր «խորքային ճշգրտության հարվածի» զենք են մշակելու՝ ավելի քան 2000 կմ հեռահարությամբ
Քաղաքականություն
15.05.2025 | 16:10
Մեծ Բրիտանիան և Գերմանիան համատեղ մշակելու են նոր «խորքային ճշգրտության հարվածի» զենք՝ ավելի քան 2000 կիլոմետր հեռահարությամբ։ Այս հայտնել է Reuters-ը՝ հղում անելով Մեծ Բրիտանիայի կառավարությանը, փոխանցում է DW-ի ռուսական ծառայությունը։
Նախագիծը հիմնված է անցյալ տարի ստանձնած պարտավորության վրա՝ 2024 թվականի հոկտեմբերին երկկողմ պաշտպանական համաձայնագրի շրջանակներում նոր զենք մշակելու վերաբերյալ։ Լոնդոնը և Բեռլինը ընդգծել էին, որ Եվրոպան պետք է ի վիճակի լինի պաշտպանվել Ուկրաինայում պատերազմի հնարավոր սրման դեպքում։
Փաստաթուղթը, մասնավորապես, նախատեսում է «ՆԱՏՕ-ի արևելյան թևի պաշտպանություն, կարողությունների բացերի վերացում, փոխգործունակության բարելավում և Ուկրաինայի հետագա աջակցություն», հստակեցնում է AFP-ը։
Մեծ Բրիտանիայի պաշտպանության նախարար Ջոն Հիլին և Գերմանիայի պաշտպանության նախարար Բորիս Պիստորիուսը Բեռլինում կհայտարարեն նախագծի մեկնարկի մասին։
«Այս գործընկերությունը մեզ օգնում է պաշտպանությունը վերածել աճի շարժիչ ուժի՝ ստեղծելով աշխատատեղեր, զարգացնելով հմտություններ և խթանելով ներդրումները Մեծ Բրիտանիայում ու Գերմանիայում»,- ասել է Հիլին։
Լոնդոնը չի նշել նախաձեռնության իրականացման ժամկետները կամ դրա բյուջեն։ Նախարարները նաև կքննարկեն ծովային պարեկային և հետախուզական ինքնաթիռների համար տորպեդոների համատեղ գնումները և կհայտարարեն Գերմանիայի կողմից բրիտանական արտադրության ռազմական կամուրջներ գնելու գործարքի մասին։ Բեռլինն էլ հայտնում է, որ գերմանա-բրիտանական համագործակցությունը «կարևոր ներդրում է ունենում համաեվրոպական զսպման և պաշտպանության գործում»։
Բեռլինի և Լոնդոնի միջև 2024 թվականի հոկտեմբերին կնքված պաշտպանական համաձայնագիրը ենթադրում է նոր հեռահար զենքերի մշակում, Մեծ Բրիտանիայում Rheinmetall-ի կողմից տանկերի արտադրություն և ՆԱՏՕ-ի արևելյան սահմանին համատեղ զորավարժություններ։
«Օդային, ցամաքային, ծովային և կիբերոլորտներում նախագծերի միջոցով մենք համատեղ կբարձրացնենք մեր պաշտպանական կարողությունները՝ դրանով իսկ ամրապնդելով ՆԱՏՕ-ի եվրոպական բաղադրիչը»,- փաստաթուղթը ստորագրելուց առաջ ասել էր Բորիս Պիստորիուսը։
Նա նաև շեշտել էր՝ համաձայնագրի շրջանակում իրականացվելիք նախագծերը բաց կլինեն նաև ՆԱՏՕ-ի և ԵՄ-ի այլ դաշնակիցների ու գործընկերների համար։
Թարգմանությունը՝ Էմմա Չոբանյանի
