Լեհաստանը ՌԴ-ին մեղադրել է Վարշավայի առևտրի կենտրոնի հրկիզման համար և հայտնել Կրակովում ռուսական հյուպատոսությունը փակելու մասին

Լեհաստանը ռուսական հետախուզական ծառայություններին մեղադրել է 2024 թվականի մայիսին Վարշավայի Marywilska առևտրի կենտրոնը հրկիզելու մեջ։ Նման հայտարարությամբ հանդես է եկել երկրի վարչապետ Դոնալդ Տուսկը։

«Այժմ մենք հաստատ գիտենք, որ Վարշավայի Marywilska առևտրի կենտրոնի մեծ հրդեհը տեղի է ունեցել ռուսական հատուկ ծառայությունների կողմից պատվիրված հրկիզման հետևանքով։ Հանցագործներից մի քանիսն արդեն ձերբակալվել են, մյուս բոլորը նույնականացվել և որոնվում են։ Մենք բոլորիդ կբռնենք»,- գրել է Տուսկը X- իր միկրոբլոգում։

Բացի այդ, Լեհաստանի ներքին գործերի նախարար, լեհական հատուկ ծառայությունների համակարգող Տոմաշ Սիմոնիակը X-ում համատեղ հայտարարություն է հրապարակել արդարադատության նախարար և գլխավոր դատախազ Ադամ Բոդնարի հետ՝ պնդելով, որ առևտրի կենտրոնում հրդեհը «ռուսական հատուկ ծառայությունների կողմից պատվիրված հրկիզման արդյունք է»։

Այս եզրակացությանը լեհական կողմը հանգել է «ինտենսիվ հետաքննության» ընթացքում, որին մասնակցել են նաև լիտվական հատուկ ծառայությունները։

«Մենք խորը գիտելիքներ ունենք հրկիզման կարգի և ընթացքի, ինչպես նաև հանցագործների կողմից դրա փաստաթղթավորման մասին: Նրանց գործունեությունը կազմակերպվել և ղեկավարվել է Ռուսաստանի Դաշնությունում գտնվող նույնականացված անձի կողմից: Հանցագործներից մի քանիսն արդեն ձերբակալվել են, մնացածը նույնականացվել են և որոնվում են»,- ասվում է հայտարարության մեջ:

Նշում է, որ լեհական իշխանությունները «վճռական են՝ պատասխանատվության ենթարկելու ամոթալի դիվերսիաների համար պատասխանատուներին»։

Լեհաստանի ԱԳ նախարար Ռադոսլավ Սիկորսկին իր հերթին հայտնել է Կրակովում ռուսական հյուպատոսությունը փակելու որոշման մասին։

«Հաշվի առնելով այն փաստը, որ ռուսական հատուկ ծառայությունները դատապարտելի դիվերսիա են կատարել Մարիվիլսկա փողոցի առևտրի կենտրոնի դեմ, ես որոշել եմ հետ վերցնել Կրակովում ՌԴ հյուպատոսության գործունեության վերաբերյալ իմ համաձայնությունը»,- ասվում է X-ի միկրոբլոգում գրառման մեջ։

Ռուսաստանի արձագանքը չի ուշացել։ ՌԴ ԱԳ նախարարության պաշտոնական ներկայացուցիչ Մարիա Զախարովան ՌԲԿ-ին ասել է, որ Մոսկվան «համարժեք պատասխան» կտա Կրակովում Ռուսաստանի հյուպատոսության փակմանը։

«Վարշավան շարունակում է միտումնավոր խաթարել հարաբերությունները՝ գործելով քաղաքացիների շահերի դեմ։ Այս ոչ ադեկվատ քայլերին շուտով ադեկվատ պատասխան կտրվի»,- ասել է նա։

Վարշավայի Marywilska առևտրի կենտրոնում հրդեհը տեղի է ունեցել 2024 թվականի մայիսի 12-ին։ Այն ամբողջությամբ կլանել էր շենքը՝ մասամբ փլուզելով կառույցը։ Հրդեհի հետևանքով ոչ ոք չէր տուժել։ Դրա տարածքը կազմել էր ավելի քան 60 հազար քառակուսի մետր։

Marywilska-ն Վարշավայի ամենամեծ մեծածախ և մանրածախ առևտրի կենտրոնն էր՝ գործող շուրջ 1400 կետով։ Մասնագետներն անմիջապես ենթադրություն էին հայտնել, որ շենքը դիտավորյալ է հրկիզվել, քանի որ կրակը շատ կարճ ժամանակում տարածվել է շատ մեծ տարածքի վրա։

Թարգմանությունը՝ Էմմա Չոբանյանի