17.07.2026 | 10:03
Արտարժույթների փոխարժեքները՝ հուլիսի 17-ի դրությամբ
Մեծ Բրիտանիան պատժամիջոցներ է սահմանում ՌԴ-ի ստվերային նավատորմի 100 լցանավերի նկատմամբ
Քաղաքականություն
09.05.2025 | 13:42
Մեծ Բրիտանիայի կառավարությունը հայտարարել է, որ պատժամիջոցների ցուցակում կավելացնի Ռուսաստանի ստվերային նավատորմի մինչև 100 լցանավ, գրում է BBC-ի ռուսական ծառայությունը։
Կառավարության մամուլի հաղորդագրության մեջ ասվում է, որ դրանք կազմում են Ռուսաստանի նավթի արտահանման ստվերային նավատորմի միջուկը և 2024 թվականի սկզբից ի վեր տեղափոխել են 24 միլիարդ դոլարի նավթ։ Մեծ Բրիտանիան արդեն պատժամիջոցներ է կիրառել ռուսական նավթ տեղափոխող մի քանի տասնյակ լցանավերի նկատմամբ։
Բրիտանիայի վարչապետ Քեյր Սթարմերը պատրաստվում է նոր պատժամիջոցների մասին հայտարարել այսօր Նորվեգիայում։
«Ռուսաստանից մեր ազգային անվտանգությանը սպառնացող վտանգը չի կարելի թերագնահատել, այդ իսկ պատճառով մենք կանենք այն ամենը, ինչ մեր ուժերի սահմաններում է՝ խափանելու Պուտինի ստվերային նավատորմի աշխատանքը, զրկելու նրա ռազմական մեքենային նավթային եկամուտներից և պաշտպանելու մեր ստորջրյա ենթակառուցվածքները»,- ասել է Քիր Սթարմերը։
Բրիտանական կառավարությունը հիշեցնում է, որ ստվերային նավատորմի լցանավերը ոչ միայն օգնում են Մոսկվային գումար վաստակել Ուկրաինայում պատերազմի համար, այլև վնասում են Եվրոպայում ստորջրյա մալուխները։
Համատեղ արշավախմբային ուժերի անդամ երկրների ղեկավարներն այսօր հանդիպելու են Օսլոյում՝ ի թիվս այլ հարցերի, քննարկելու նաև ստորջրյա ենթակառուցվածքների պաշտպանությունը։ Միացյալ արշավախմբային ուժերը կազմավորվել են Մեծ Բրիտանիայի, Դանիայի, Նիդերլանդների, Շվեդիայի, Նորվեգիայի և Ֆինլանդիայի կողմից՝ Էստոնիայի Լատվիայի, Լիտվայի և Իսլանդիայի հետ միասին։
Թարգմանությունը՝ Էմմա Չոբանյանի
