Երբ «դարձի» են գալիս հանրապետականները

Արտահերթ խորհրդարանական ընտրություններին ընդառաջ, թեև «Հանրապետական» կուսակցությունը շարունակում է պնդել, որ դրանց ժամկետների մասին որևէ հստակ պայմանավորվածություն չկա, սակայն, նախկին և ներկա որոշ ՀՀԿ-ական պատգամավորներ շտապեցին պաշտպանել վարչապետի առաջ քաշած թեզն ու հայտարարել, որ կողմ են օր առաջ արտահերթ խորհրդարանական ընտրություններ անցկացնելու գաղափարին։

«Դարձի» եկածներից առաջինը Գևորգ Կոստանյանն է։

Վերջինս Ազատության հետ զրույցում այսօր նշել է, որ այսօրվա իշխանությունը և Նիկոլ Փաշինյանը՝ որպես վարչապետ, ունի ժողովրդական և հանրային աջակցության այն մակարդակը, որը կարիք ունի օժանդակելու նաև իրավական հարթության մեջ: Կոստանյանը գտնում է, որ Հայաստանում այս պահին ստեղծված քաղաքական իրավիճակում վարչապետ Նիկոլ Փաշինյանի հրաժարականի դեպքում վարչապետի մեկ այլ թեկնածու առաջադրելը կարող է քաղաքական ու հասարակական լուրջ ռեզոնանս արձանագրել:

«Նա ազնիվ է իր քաղաքական ուղղվածության մեջ, որը ինձ համար ընդունելի է անձնապես: Այլ հարց է, թե դա հիմա ինչ չափով է իրականացվում: Իմ ասածը հետևյալն է՝ եթե ես գտնում եմ, որ նպատակների, ցանկությունների, գործողությունների մեջ կա այդ ազնվությունը և երկրի բարօրության համար է իրականացվում, ես միշտ կկանգնեմ իր կողքին ցանկացած պահի»,- խոսելով  Փաշինյանի մասին ասել է Կոստանյանը։

Արտահերթ խորհրդարանական ընտրությունների՝ հնարավորին արագ անցկացման պաշտպանությամբ հանդես է եկել նաև մեկ այլ պատգամավոր, նախկին ՀՀԿ-ական Արման Սահակյանը։

Վերջինս իր ֆեյսբուքյան էջում գրել է, որ հաշվի առնելով երկրում տիրող ճգնաժամային իրավիճակը, հայտարարում է, որ կողմ է Ազգային ժողովի լուծարմանը և արտահերթ ընտրությունների անցկացմանը դեկտեմբերին։

«Հանրապետական» կուսակցության մեկ այլ պատգամավոր Ալիկ Սարգսյանն էլ, ով դեռևս ամռանն էր ասել, որ չի ցանկանում քաղաքականությամբ զբաղվել, մեզ հետ զրույցում նշել է, որ  ժամանակավորապես դադարեցրել է իր գործունեությունը ԱԺ-ում, շաբաթից ավել է՝ ինչ Ազգային ժողով չի գնացել և չի մասնակցել որևէ բանի:

«Հանրապետական» կուսակցության ռեյտինգային ցուցակով պատգամավոր ֆելիքս Ցոլակյանին հաջորդող Մարտուն Գրիգրոյանն էլ շտապել է հայտարարել, որ  թեև ինքը կուսակցական չէ, սակայն Ֆելիքս Ցոլակյանից իրեն փոխանցվող պատգամավորական մանդատը վերցնելուն պես շտապելու է դիմում գրել և դուրս գալ  ԱԺ «Հանրապետական» խմբակցությունից։

Փաստորեն՝ մի քանի ժամվա մեջ ՀՀԿ-ի շարքերը նոսրացրեցին մի քանի պատգամավորներ, որոնց թիվն, անկասկած, կավելանա՝ հատկապես, որ վարչապետ Փաշինյանը կոչ է արել, ոչ թե քննադատել, այլ քաջալերել  նրանց։