17.07.2026 | 11:27
Գազանջատում՝ Հաղարծին բնակավայրի որոշ հասցեներում
Պուտինն ու Փեզեշքիանը հեռախոսազրույց են ունեցել
Քաղաքականություն
06.05.2025 | 16:43
Ռուսաստանի նախագահ Վլադիմիր Պուտինը և Իրանի նախագահ Մասուդ Փեզեշքիանը հեռախոսազրույց են ունեցել, հաղորդում է Կրեմլի մամուլի ծառայությունը:
Հաղորդագրության համաձայն՝ նրանք պայմանավորվել են ակտիվացնել և ամրապնդել համատեղ աշխատանքը համագործակցության և արտաքին քաղաքականության ուղղությունների համակարգման ուղղությամբ: Կողմերը քննարկել են Համապարփակ ռազմավարական գործընկերության պայմանագրի հիման վրա ռուս-իրանական համագործակցության զարգացման հարցերը:
Հատուկ ուշադրություն է դարձվել փոխշահավետ առևտրաներդրումային կապերի ընդլայնմանը, այդ թվում՝ տրանսպորտի և էներգետիկայի ոլորտներում խոշոր համատեղ ծրագրերի իրականացման հաշվին:
Ըստ Կրեմլի հաղորդագրության՝ տեղի է ունեցել կարծիքների փոխանակում միջազգային և տարածաշրջանային արդի խնդիրների շուրջ, ներառյալ՝ Օմանի միջնորդությամբ Իրանի և ԱՄՆ-ի միջև իրանական միջուկային ծրագրի շուրջ բանակցությունները: Հաստատվել է ռուսական կողմի պատրաստակամությունը՝ նպաստելու այս երկխոսության առաջխաղացմանը՝ միջազգային իրավունքի սկզբունքների վրա հիմնված արդարացի համաձայնության հասնելու նպատակով:
Պուտինը ցավակցություն է հայտնել իրանական Շահիդ-Ռաջաի նավահանգստում պայթյունի կապակցությամբ, որի հետևանքով զոհվել էր 65 մարդ:
Իրանի նախագահը ջերմորեն շնորհավորել է Վլադիմիր Պուտինին և Ռուսաստանի քաղաքացիներին Երկրորդ համաշխարհային պատերազմում Հաղթանակի 80-ամյակի կապակցությամբ:
