07.10.2026 | 23:48
Արթուր Դանիելյանը կալանավորվեց
Նպատակը Լոռու և Սյունիքի մարզերում 5000 հա անտառ տնկելն ու մշակելն է․ կայացել է ծրագրի ղեկավար խորհրդի նիստը
05.05.2025 | 18:41
Կայացել է «Հայաստանում անտառների դիմակայության բարձրացում՝ մեղմացման միջոցառումների շնորհիվ հարմարեցման և գյուղական վայրերում կանաչ տարածությունների ընդլայնման միջոցով» ծրագրի ղեկավար խորհրդի երրորդ նիստը․ տեղեկացնում են ՊԳԿ-ի հայաստանյան գրասենյակից։
2025 թ․-ի ապրիլի 29-ին Շրջակա միջավայրի փոխնախարար Արա Մկրտչյանը բացեց Երևանում կայացած «Հայաստանում անտառների դիմակայության բարձրացում՝ մեղմացման միջոցառումների շնորհիվ հարմարեցման և գյուղական վայրերում կանաչ տարածությունների ընդլայնման միջոցով» ծրագրի ղեկավար խորհրդի երրորդ նիստը։ Ծրագրի նպատակն է Հայաստանում, մասնավորապես՝ Լոռու և Սյունիքի մարզերում, տնկել և մշակել 5000 հա անտառ։
Շրջակա միջավայրի նախարարի տեղակալ Արամ Մեյմարյանը ծրագրի ղեկավար խորհրդի նախագահությունը հանձնեց Արա Մկրտչյանին: Բացման խոսքում նա ընդգծեց Հայաստանի համար անտառների կարևոր նշանակությունը՝ որպես կլիմայի փոփոխության մեղմացման միջոց։ Նա նաև շեշտեց համատեղ ջանքերի գործադրման անհրաժեշտությունը՝ Հայաստանի անտառային էկոհամակարգերի երկարաժամկետ կայունությունն ու դիմակայունությունն ապահովելու համար:
Պարենի և գյուղատնտեսության կազմակերպության (ՊԳԿ) ներկայացուցիչ Ռայմունդ Յելեն իր խոսքում շնորհակալություն հայտնեց ծրագրի դոնորներին և համաֆինանսավորողներին՝ շարունակական աջակցության համար, և կարևորեց ծրագրի իրականացման գործընկեր՝ Բնապահպանական ծրագրերի իրականացման գրասենյակի (ՊՀ) հետ սերտ և արդյունավետ համագործակցության դերը՝ ծրագրի նպատակների իրագործման համար։
Հանդիպումը տեխնիկական քննարկումների հարթակ ծառայելուց զատ, մասնակիցներին հնարավորություն տվեց քննարկել գլխավոր ձեռքբերումները և շոշափելի արդյունքները, որոնք նշանակալի առաջընթաց են ապահովում կայուն անտառակառավարման և կլիմայի դիմակայունության ուղղությամբ։
2024 թ․-ի կարևոր ձեռքբերումների շարքում առանձնացվեց անտառային ծառատեսակների 126,000 տնկիների հաջող արտադրությունը, որը կարևոր քայլ է Հայաստանի անտառվերականգնման և կենսաբազմազանության ապահովման նպատակների իրականացման համար։ Տնկիները, որոնք աճեցվել են մարզերի տնկարաններում, ապահովել են ծրագրի թիրախային տարածքներում անտառապատման աշխատանքների ժամանակին իրականացումը:
Հետագա քայլերի մասին․ 2025 թ․-ի անտառատնկման սեզոնի նախապատրաստական աշխատանքներն ակտիվ ընթացքի մեջ են․ ներկայումս աճեցվում է 548,184 տնկի:
Զգալի առաջընթաց է գրանցվել նաև անտառների պետական հաշվառման գործընթացում։ Արդեն իսկ չափագրվել է 264 հողատարածք, որը պլանավորված աշխատանքների ընդհանուր ծավալի 83.4 % է։ Այս կարևոր նախաձեռնությունն արժեքավոր տվյալներ է տրամադրում՝ անտառների առողջության գնահատման, անտառային ռեսուրսների կայուն օգտագործման և փաստարկված քաղաքականության մշակման համար։
Հայաստանի՝ վերականգնվող էներգետիկայի և էներգախնայողության ոլորտի զարգացման հեռանկարի հանձնառության համաձայն, ընդունվել է էներգախնայողության վերաբերյալ չորս ազգային ստանդարտ, որոնք ուղված են բարելավելու գործելակերպը և՛ պետական, և՛ մասնավոր սեկտորներում։ Քաջարանի, Վանաձորի և Ալավերդու մասնագիտական ուսումնական հաստատություններին տրամադրվել են եռակցման սարքավորումներ՝ էներգախնայող տեխնոլոգիաների ուսուցումը բարելավելու և տեխնիկական մասնագետների նոր սերունդ նախապատրաստելու նպատակով։
Ղեկավար խորհրդի նիստը հնարավորություն ընձեռեց մասնակիցներին քննարկել աշխատանքների իրականացման ընթացքը, վերլուծել և գնահատել մարտահրավերները, ամփոփել հիմնական ձեռքբերումները, և սահմանել գործնական քայլեր՝ առաջիկա տարում ծրագրի արդյունավետությունն ու ազդեցությունն ավելի բարձրացնելու համար։
