Մախաչկալայում ոստիկանների վրա զինված հարձակում է տեղի ունեցել․ զոհեր և վիրավորներ կան․ ՏԵՍԱՆՅՈՒԹ

Մախաչկալայում երկու զինված անձինք կրակ են բացել ճանապարհային ոստիկանության պարեկային մեքենայի ուղղությամբ: Այս մասին հայտնել են ուժայինների հետ սերտ կապեր ունեցող «112», Mash և Baza տելեգրամ ալիքները, գրում է Meduza-ն։

ՌԻԱ Դաղստանի տվյալներով՝ զոհվել է ոստիկանության երեք աշխատակից։ Հարձակվողները դեպքի վայրից փախել են գողացված ծառայողական մեքենայով։ Քաղաքը հայտարարել է «Պերեխվատ» պլանի մասին։

Baza-ն գրում է երկու մահացած ոստիկանի մասին։ Նշվում է, որ փոխհրաձգությունը տեղի է ունեցել Տագիրովա փողոցում։

Փոխհրաձգության փաստը ՏԱՍՍ-ին հաստատել են Մախաչկալայի վարչակազմից։ Նրանք նշել են, որ իրավապահ մարմինները օպերատիվ-հետախուզական գործողություններ են իրականացնում։

Դաղստանի ղեկավար Սերգեյ Մելիկովն էլ հայտարարել է, որ ՆԳՆ աշխատակիցը փորձել է կանգնեցնել մեքենան, սակայն վարորդը չի ենթարկվել և կրակ է բացել։ Հաղորդվում է զոհերի մասին։ Մելիկովն այլ մանրամասներ չի տրամադրել, միայն խնդրել է միջադեպը չնկարահանել, լուսանկարները կամ տեսանյութերը չհրապարակել առցանց։

Դաղստանի ՆԳՆ-ն ավելի ուշ հաստատել է, որ հարձակման հետևանքով զոհվել է երեք ոստիկան, իսկ հարձակվողները փախել են ծառայողական մեքենայով։

«Այսօր ժամը 14:20-ի սահմաններում Մախաչկալա քաղաքում անհայտ անձինք հարձակվել են Դաղստանի Հանրապետության ՆԳՆ ճանապարհային ոստիկանության ստորաբաժանման վրա»,- ասվում է գերատեսչության հայտարարության մեջ։

Նշվում է, որ հարձակվողներին փնտրում են։

Ավելի ուշ Ներքին գործերի նախարարությունը հայտնել է, որ երկու հարձակվողները սպանվել են։ Թե քանի մարդ է մասնակցել հարձակմանը, պաշտոնապես չի հաղորդվում։ Դաղստանի առողջապահության նախարարությունը հայտարարել է, որ փոխհրաձգության ժամանակ վիրավորվել է 17-ամյա մի աղջիկ։ Բացի այդ, հոսպիտալացվել են երկու ոստիկաններ։ Ընդհանուր առմամբ, վիրավորվել է յոթ մարդ։

Թարգմանությունը՝ Էմմա Չոբանյանի