«Այլընտրանք Գերմանիայի համար» կուսակցությունը դաշնային մակարդակով «աջ ծայրահեղական» է ճանաչվել

Գերմանիայի Սահմանադրության պաշտպանության դաշնային գերատեսչությունը «Այլընտրանք Գերմանիայի համար» կուսակցությունը դաշնային մակարդակով դասակարգել է որպես աջ ծայրահեղական, գրում է DW-ի ռուսական ծառայությունը։

Գերատեսչությունն իր որոշումը հիմնավորել է «կուսակցության ընդհանուր ծայրահեղական բնույթով, որն անտեսում է մարդկային արժանապատվությունը»։ Նշվում է, որ Սահմանադրության պաշտպանության դաշնային գերատեսչությունը համապատասխան գնահատականը տվել է «ինտենսիվ և համապարփակ փորձագիտական ​​​​ուսումնասիրությունից հետո»։

«Կասկածները, որ կուսակցությունը հետապնդում է ազատ ժողովրդավարական կարգի դեմ ուղղված նպատակներ, հաստատվել են և, ըստ էության, մեծ մասամբ վերածվել են համոզման։ Կուսակցությունում էթնիկ և կլանային պատկանելության վրա հիմնված ըմբռնումն անհամատեղելի է հիմնարար ազատ ժողովրդավարական կարգի հետ»,- ասվում է հայտարարության մեջ։

Ըստ գերատեսչության՝ կուսակցության նպատակն է բնակչության որոշակի խմբերին զրկել հասարակության կյանքին հավասար մասնակցությունից։ Մասնավորապես, AfD-ն գերակշռող մուսուլմանական բնակչություն ունեցող երկրներից Գերմանիայի քաղաքացիներին համարում է «գերմանական ժողովրդի անհավասար ներկայացուցիչներ՝ ըստ էթնիկ սահմանման»։

Գերատեսչության ղեկավարի տեղակալներ Սինան Սելենի և Սիլկե Վիլեմսի կարծիքով՝ կուսակցության, ինչպես նաև նրա առաջատար ներկայացուցիչների հայտարարություններն ու դիրքորոշումները խախտում են մարդկային արժանապատվության սկզբունքը։

Նախկինում Թյուրինգիայի, Սաքսոնիայի և Սաքսոնիա-Անհալթի «Այլընտրանք Գերմանիայի համար» պետական ​​կազմակերպությունները Գերմանիայում ճանաչվել էին որպես աջ ծայրահեղական։

AfD-ն հիմնադրվել է 2013 թվականին՝ որպես եվրոսկեպտիկների կուսակցություն։ Ժամանակի ընթացքում կուսակցությունը շեղվել է դեպի աջ, նրա ծայրահեղ աջ «թևը» հզորացել, բայց պաշտոնապես լուծարվել է։ Վերջին տարիներին կուսակցության ժողովրդականությունը Գերմանիայում աճել է, և այժմ այն ​​ներկայացված է Բունդեսթագում և բազմաթիվ նահանգային խորհրդարաններում։

Մեկնաբանելով դաշնային գերատեսչության կողմից AfD կուսակցությանն աջ ծայրահեղականի կարգավիճակ շնորհելու որոշումը՝ մինչև նոր կառավարության ձևավորումը Գերմանիայի ներքին գործերի նախարարի պաշտոնակատար Նենսի Ֆազերը նշել է, որ փորձագիտական ​​​​գնահատականի վրա «քաղաքական որևէ ազդեցություն» չի գործադրվել։

«Հատուկ ծառայությունը, օրենքի համաձայն, ունի աջ ծայրահեղականության կանխարգելման և ժողովրդավարության պաշտպանության հստակ խնդիր։ Միաժամանակ, այն գործում է անկախ։ Նոր գնահատականը հստակ և միանշանակ է, քանի որ ապացուցվել է, որ AfD-ն զբաղվում է ազատ ժողովրդավարական կարգի հիմքերին հակասող գործունեությամբ։ Կուսակցությունը դիրքորոշում է որդեգրել, որը նշանակում է, որ բնակչության ամբողջ խմբեր խտրականության են ենթարկվում, իսկ միգրացիոն կենսագրություն ունեցող քաղաքացիները երկրորդ կարգի գերմանացիներ են համարվում»,- նշել է նախարարը՝ հավելելով, որ դա ակնհայտորեն հակասում է մարդու արժանապատվության հարգման սկզբունքին, որն ամրագրված է Հիմնական օրենքի 1-ին հոդվածում։

Թարգմանությունը՝ Էմմա Չոբանյանի