24.06.2026 | 13:53
3 արծաթե և 1 բրոնզե մեդալ աշխարհագրության միջազգային 2-րդ բաց օլիմպիադայից
Իսրայելում արտակարգ դրություն է հայտարարվել անտառային հրդեհների պատճառով, 1000-ավոր մարդիկ են տարհանվել
Քաղաքականություն
01.05.2025 | 18:11
Իսրայելում հրդեհները շարունակում են սպառնալ անտառներին ու դաշտերին՝ չնայած հրշեջները հաջողությամբ բացել են երկրի երկու հիմնական քաղաքները կապող գլխավոր ճանապարհը, գրում է The Guardian-ը։
Երուսաղեմ-Թել Ավիվ գլխավոր մայրուղում չորեքշաբթի բռնկված հրդեհներից հետո Իսրայելի վարչապետ Բենիամին Նեթանյահուն արտակարգ դրություն է հայտարարել երկրում, ինչի հետևանքով ոստիկանությունը փակել է մայրուղին և մոտակա համայնքներից տարհանել հազարավոր մարդկանց։ Հարյուրավոր մարդիկ ստիպված են եղել լքել իրենց տները Երուսաղեմից մոտ 19 մղոն (30 կմ) արևմուտք, իսկ Իսրայելի ամենահայտնի հեռուստաընկերությունը՝ Channel 12-ը, լրատվական թողարկման ժամանակ հարկադրված անջատել է հեռարձակումը քաղաքից շուրջ 10 մղոն հեռավորության վրա գտնվող ստուդիայից։
Հրդեհները բորբոքող ուժեղ քամիները ստիպել են չեղարկել 1948 թվականին Իսրայելի հիմնադրմանը նվիրված բազմաթիվ միջոցառումներ: Նախատեսված միջոցառման փոխարեն ցուցադրվել է ջահը վառելու արարողության՝ նախապես ձայնագրված փորձը: Իսրայելի նախագահ Իցհակ Հերցոգն ասել է, որ անտառային հրդեհները «կլիմայական ճգնաժամի մի մասն են, որը երբեք չպետք է անտեսվեն»։
Լրատվամիջոցը գրում է, որ տոնակատարություններն արդեն իսկ հակասություններ էին առաջացրել՝ այն բանից հետո, երբ նախարարները որոշ միջոցառումների ժամանակ քննադատության էին ենթարկվել ՀԱՄԱՍ-ի կողմից Գազայում պահվող բոլոր պատանդներին վերադարձնել չկարողանալու համար, իսկ երեքշաբթի աջակողմյան ակտիվիստները հարձակվել են սինագոգի վրա, որտեղ ցուցադրվում էր արաբա-իսրայելական համատեղ հիշատակի միջոցառում։ Քաղաքական լարվածությունը բարձր է մի քանի անհանգիստ շաբաթներից հետո, որոնք ուղեկցվել են բողոքի ալիքներով և Նեթանյահուի ու Շին Բեթի ներքին անվտանգության ծառայության ղեկավարի միջև հանրային բախումով։ Հերցոգը կոչ է արել վերջ դնել Իսրայելում «բևեռացմանը»։
Իսրայելցի զինվորականները հայտարարել են, որ զորքերն օգնում են Երուսաղեմում և այլ կենտրոնական շրջաններում հրդեհաշիջման աշխատանքներին։
Բժշկական փրկարարական ծառայությունն էլ հայտնել է, որ չորեքշաբթի բուժօգնություն է ցուցաբերել 23 մարդու, որոնց մեծ մասը ծուխ ներշնչելու և այրվածքների պատճառով է։ Ըստ հանրային հեռարձակող Kan-ի՝ վիրավորվել է 17 հրշեջ։
Չորեքշաբթի ուշ երեկոյան ԱԳՆ-ն հայտարարել էր, որ ակնկալվում է Խորվաթիայից, Ֆրանսիայից, Իտալիայից, Ռումինիայից և Իսպանիայից հրշեջ ինքնաթիռների ժամանում՝ գործողությանը մասնակցելու համար։
Աջ ծայրահեղական ազգային անվտանգության նախարար Իտամար Բեն-Գվիրը ակնարկել է, որ հրկիզումները, հնարավոր է, միտումնավոր են եղել, չնայած իշխանությունները նման պնդումները հաստատող որևէ ապացույց չեն ներկայացրել։
Հրշեջ-փրկարարական ծառայությունը հայտարարել է, որ լայնածավալ հրդեհների պատճառը դեռևս պարզ չէ։
Բենիամին Նեթանյահուն էլ հայտարարել է, որ մինչ այժմ ձերբակալվել է 18 մարդ՝ Երուսաղեմի մերձակայքում անտառային հրդեհների բռնկմանը նպաստելու կասկածանքով։
«Հրդեհը պարզ բան չէ, կա վնաս բնությանն ու մարդկանց, և մենք ներկայում կալանքի տակ ենք պահում 18 մարդու, որոնց կասկածում են հրկիզման մեջ, որոնցից մեկը բռնվել է հանցագործության վայրում»,- ասել է Նեթանյահուն։
Ոստիկանության աղբյուրները, սակայն, տեղական լրատվամիջոցներին հայտնել են 3 ձերբակալվածի մասին։ Ավելին, աղբյուրները ենթադրում են, որ երեքն էլ կասկածվում են ոչ թե Երուսաղեմից դուրս տեղի ունեցած զանգվածային անտառային հրդեհներին մասնակցելու, այլ ուրիշ վայրում հրդեհներ առաջացնելու փորձի մեջ։
Թարգմանությունը՝ Էմմա Չոբանյանի
