29.04.2026 | 23:46
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
Եթե Երևանը խախտի ԵՏՄ-ի մասին պայմանագիրը, անհրաժեշտ իրավական մեխանիզմներ կան․ ՌԴ ԱԳՆ
Քաղաքականություն
01.05.2025 | 11:40
Եվրասիական տնտեսական միությունը (ԵՏՄ) ունի միջազգային իրավական գործիքներ իր անդամ պետությունների շահերը պաշտպանելու համար՝ Հայաստանի կողմից միութենական պայմանագրի խախտման դեպքում։ Այս մասին ՌԻԱ Նովոստիին տված հարցազրույցում ասել է Ռուսաստանի ԱԳ նախարարության ԱՊՀ երկրների առաջին դեպարտամենտի տնօրեն Միքայել Աղասանդյանը։
«Եթե Երևանը ձեռնարկի քայլեր, որոնք հակասում են ԵՏՄ օրենսդրությանը, ինչը, մենք հույս ունենք, տեղի չի ունենա, այլ կերպ ասած՝ էապես կխախտի ԵՏՄ-ի մասին պայմանագիրը, մենք ունենք անհրաժեշտ միջազգային իրավական մեխանիզմներ՝ միության անդամ մյուս պետությունների շահերը պաշտպանելու համար»,- նշել է Աղասանդյանը։
Նա նշել է, որ Հայաստանը երբեք հրապարակավ կամ երկկողմ շփումների ընթացքում չի հայտարարել պայմանագրից դուրս գալու իր մտադրության մասին, ընդհակառակը, ակտիվորեն մասնակցում է Միության շրջանակում ընթացող բանակցություններին, ինչը հաստատում է նրա հետաքրքրությունը եվրասիական ինտեգրման զարգացման նկատմամբ։
ՌԴ ԱԳՆ պաշտոնյան նաև նշել է, թե Եվրամիությունը չի կարողանա փոխհատուցել Հայաստանի տնտեսության անխուսափելի կորուստները՝ ԵՏՄ-ից երկրի դուրս գալու դեպքում։
Աղասանդյանը հավելել է, որ ռուսական կողմը հայ գործընկերների հետ շփումների ժամանակ ԵՏՄ-ին և ԵՄ-ին միաժամանակյա անդամակցության անհնարինությունը բացատրում է նորմերի անհամատեղելիությամբ, իսկ Երևանում հասկանում են ինչպես ԵՏՄ-ին մասնակցելու առավելությունները, այնպես էլ դուրս գալու հետևանքները։
Հիշեցնենք՝ ՀՀ Ազգային ժողովը մարտի 26-ին երկրորդ ընթերցմամբ և ամբողջությամբ ընդունել է «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագիծը։ Ապրիլի 4-ին նախագահ Վահագն Խաչատուրյանը ստորագրել է օրենքը։
Թարգմանությունը՝ Էմմա Չոբանյանի
