ԲՀԿ-ն դեռ գործում է հին իրողությունների շրջանակում, երբ չէր հայտարարում ընդդիմություն է, թե իշխանություն․ քաղաքագետները՝ Գագիկ Ծառուկյանի վերջին հարցազրույցի մասին. ՏԵՍԱՆՅՈՒԹ

«Ծառուկյան» դաշինքի առաջնորդ Գագիկ Ծառուկյանը երեկ տված հարցազրույցում հերքել է ՀՀԿ-ի կամ Ռոբերտ Քոչարյանի հետ համագործակցելու մասին լուրերը:

Քաղաքագետ Արմեն Բադալյանի կարծիքով՝ այս հարցազրույցը ոչ այլ ինչ էր, քան կուսակցության իմիջը փրկելու փորձ։ Բադալյանի կարծիքով, ԲՀԿ-ն ուներ ռեալ շանս մեծ թվով ձայներով խորհրդարան անցնելու համար, սակայն հայտնի օրինագծին կողմ քվեարկելուց հետո մեծ հարված հասցրեց կուսակցության վարկանիշին:

Գագիկ Ծառուկյանը հարցազրույցում նշում է, որ ինքը ևս հեղափոխության օրերին ներդրումն է ունեցել, սա, սակայն, քաղաքագետների համար անհասկանալի հայտարարություն է։ Ստեփան Սաֆարյանը նշում է, հեղափոխությունը բիզնես չէ, որ ամեն մեկը դրա ավարտից հետո իր բաժինը պահանջի ու նաև հիշեցնում, որ ԲՀԿ-ն հեղափոխությանը միացավ Սերժ Սարգսյանի հրաժարականից կես ժամ առաջ:

Քաղաքագետ Արմեն Բադալյանն էլ Ծառուկյանին հիշեցրեց ավագանու ընտրությունները, ասաց՝ այդ օրը ժողովուրդն իր քվեով ցույց տվեց ում է համարում հեղափոխությանը մասնակցած ուժ: Մինչև Ծառուկյանի հարցազրույցը ԲՀԿ-ականները չէին շտապում հայտարարել կողմ են դեկտեմբեր ամսին արտահերթ ընտրություններ անցկացնելուն, թե՝ ոչ։ ԲՀԿ-ի առաջնորդն իր հարցազրույցում ասաց՝ եթե ժողովուրդը կողմ է, մենք էլ ենք կողմ։

Ստյոպա Սաֆարանի համար այս հայտարարությունն էլ ընկալելի չէ։ «ԲՀԿ-ն դեռ գործում է հին իրողությունների շրջանակում, երբ չէր հայտարարում ընդդիմություն է, թե իշխանություն, ինքն իրեն բնորոշում է այլընտրանք, բայց թե ինչին՝ պարզ չէ»,- ասում է քաղաքագետ Ստյոպա Սաֆարյանը, հավելելով, որ նման քաղաքագիտական կեցվածք գոյություն չունի: Քաղաքագետ Արմեն Բադալյանը նաև ասաց, որ ընտրությունները դեկտեմբերին կկայանան, դա այլևս քննարկման հարց չէ, այլ հարց է՝ այդ ընտրություններին քաղաքական ուժերը լավով են գնալու, թե «չորով»՝ ժողովրդին կրկին ոտքի հանելով։

Լիլիթ Շաբոյան