10.10.2026 | 17:44
Հայաստանի կրտսեր տարիքի պատանիների հավաքականը Եվրոպայի ստուգատեսում կունենա 17 բռնցքամարտիկ
Մանվել Գրիգորյանը կմնա կալանավորված․Դատախազությունը մերժել է ներկայացված միջնորդությունը
Հասարակություն
05.10.2018 | 17:22
ԱԺ պատգամավոր, գեներալ Մանվել Գրիգորյանը վերջերս ենթարկվեց դատաբժշկական փորձաքննության, որը նշանակվել էր Հատուկ քննչական ծառայության կողմից։
Factor.am-ի հետ զրույցում ՀՔԾ մամուլի խոսնակ Մարինա Օհանջանյանը նշեց, որ դատաբժշկական փորձաքննության արդյունքը ստացվել և ուղարկվել է պաշտպանական կողմին։
«Սեպտեմբերի 25-ին փորձաքննության արդյունքները փոխանցվել են Մանվել Գրիգորյանի պաշտպաններին»,- ասաց Օհանջանյանը։
Ի՞նչ արդունքներ են արձանագրված այդ եզրակացության մեջ և արդյո՞ք Գրիգորյանի պաշտպանները պատրաստվում են խափանման միջոցը փոխելու հարցով միջնորդություն ներկայացնել, փորձեցինք պարզել փաստաբան Արսեն Մկրտչյանից։
Մեզ հետ զրույցում վերջինս նշեց․ «Այս փուլում Մանվել Գրիգորյանի պաշտպաններս որոշում ենք կայացրել չներկայացնել գործին առնչվող որևէ մանրամասն։ Միայն կարող եմ հաստատել, որ մեզ փոխանցվել են դատաբժշկական փորձաքննության արդյունքները, իսկ թե ի՞նչ եզրակացություն է տրված, չեմ կարող ասել»։
Factor.am-ը փորձեց ՀՀ գլխավոր դատախազությունից պարզել՝ արդյո՞ք Մանվել Գրիգորյանի խափանման միջոցը փոխելու միջնորդություն է ներկայացվել։ Դատախազության մամուլի խոսնակ Արևիկ Խաչատրյանը հարցին ի պատասխան նշեց․ «Պաշտպանը միջնորդություն է ներկայացրել խափանման միջոց կալանավորումը փոխելու վերաբերյալ, և կիրառելու անձնական երաշխավորություն: Միջնորդությունը սակայն մերժվել է»։
Աղավնի Սուքիասյան
