Հայաստանի տնտեսական շահերից է բխում ԱԺ արտահերթ ընտրությունների անցկացումը. վարչապետի խորհրդականը պնդում է՝ իրեն ճիշտ չեն հասկացել. ՏԵՍԱՆՅՈՒԹ

Մեր քաղաքական և տնտեսական շահերից է բխում արտահերթ խորհրդարանական ընտրությունների անցկացումը, որպեսզի ամբողջական պատկեր ունենանք ժողովրդավարության: Այս մասին այսօր՝ հոկտեմբերի 5-ին, տեղի ունեցած ասուլիսում հայտարարեց ՀՀ վարչապետի գլխավոր խորհրդական Արսեն Գասպարյանը:

«Երեկ որոշ լրատվամիջոցներում մեկնաբանություններ եղան, որոնք փորձեցին ցույց տալ, թե տարբերություն կա իմ ասածների և վարչապետի ասածների մեջ այս հարցի կապակցությամբ: Բացարձակ որևէ տարբերություն չկա. մեր թիմի բոլոր անդամներն ունեն հստակ մոտեցում, որ Հայաստանի տնտեսական շահերից է բխում, որպեսզի անցկացվեն արտահերթ խորհրդարանական ընտրությունները»,- ասաց Գասպարյանը:

Վարչապետի խորհրդականի պնդմամբ՝ իր խոսքերը պարզապես վերաբերում էին ներդրողների կողմից հետաքրքրության աճին. «Եվ բնական է, որ մենք ունենանք երկարաժամկետ քաղաքական տեսլական, քանի որ ժողովրդի պահանջն է արտահերթ ԱԺ ընտրությունների անցկացումը, հետևաբար՝ դա չափազանց կարևոր է, որպեսզի այս բոլոր ձգտումներն օտարերկրյա ներդրողների իրականացվեն, և պատկերը ամբողջական լինի. երբ կա կառավարություն, որի նպատակն է ամրապնդել ժողովրդավարությունը Հայաստանում, և կա խորհրդարան, որին ժողովուրդը դեմ է: Հետևաբար՝ այդ արտահերթ ԱԺ ընտրությյունները չափազանց կարևոր են, որպեսզի զարգանա Հայաստանի տնտեսությունը»:

Արսեն Գասպարյանի հավաստմամբ՝ վերջին երկու ամսվա ընթացքում միայն ինքն ավելի քան 100 ներդրողների հետ է հանդիպել, ընդ որում՝ և՛ օտար, և՛ սփյուռքահայ: Իսկ հետաքրքրությունների ոլորտները բազմազան են. ջրային ռեսուրսները, ջրամբարների կառուցումը, թվայնացման, էներգետիկայի, տուրիզմի, թեթև արդյունաբերության և այլ ոլորտներ:

Մանրամասները՝ տեսանյութում