24.05.2026 | 20:13
Առգրավել են Սամվել Շահրամանյանի հեռախոսը․ փաստաբան
Բաքվում Ռուբեն Վարդանյանի շինծու գործով նիստում ականների պայթյուններից «տուժածներ» են ցուցմունքներ տվել
Քաղաքականություն
22.04.2025 | 21:20
Բաքվի զինվորական դատարանում այսօր տեղի է ունեցել Արցախի նախկին պետնախարար Ռուբեն Վարդանյանի շինծու գործերով դատական նիստը` դատավոր Զեյնալ Աղաևի նախագահությամբ։ Դատավարության ընթացքում հարցաքննվել են, իբր, ականների պայթյուններից «տուժածներ», որոնց մեծ մասը դատարան է եկել հենակներով և ձեռնափայտերով։
«Տուժողներից», մասնավորապես, Էլնուր Ասկերովը, պատմել է, թե «վիրավորվել է 2023 թվականի ապրիլի 18-ին, երբ Տերտերի շրջանի Բորսունլու գյուղում անասուններին արածեցնելիս հայ զինվորների կողմից տեղադրված ականներ են պայթել։
Ակիֆ Հուսեյնովն էլ ասել է, թե «իր որդիները՝ Անարը, Ռազին և Բայրամը, ինչպես նաև թոռը՝ Հուսեյնը, պայթել են ականի վրա՝ օկուպացիայից ազատագրված տարածքներում»։ Պետական մեղադրող Ֆուադ Մուսաևի հարցերին ի պատասխան՝ Հուսեյնովն ասել է, թե ականի պայթյունների հետևանքով զոհվել են իր որդիները՝ Ռազին և Բայրամը, ինքը և մյուս որդին՝ Անարը, ծանր վիրավորվել են, իսկ թոռը՝ Հուսեյնը, թեթև վնասվածքներ է ստացել։
Ադրբեջանի ականազերծման գործակալության (ANAMA) աշխատակիցներ Յադիգար Շուքուրովը, Ղահրաման Ռզաևը, Նաջմեդդին Հուսեյնովը, Մահիր Մուստաֆաևը, Սամիր Գոզալովը, Ալի Շուքուրովը, Ֆարիդ Ջաբրայիլին, Թելման Զեյնալովը, Բահրուզ Նասիրովը և Ալեսքեր Գուլիևը պատմել են, որ ականազերծման աշխատանքների ժամանակ ոտք են դրել ականի վրա և ստացել տարբեր վնասվածքներ։
Հրապարակվել են նաև դատաբժշկական փորձաքննության արդյունքներ։
Հաջորդ դատական նիստը նշանակվել է ապրիլի 29-ին։
Թարգմանությունը՝ Էմմա Չոբանյանի
