15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Կառավարությունը բացասական եզրակացություն տվեց Էդմոն Մարուքյանի ներկայացրած նախագծին
Քաղաքականություն
04.10.2018 | 11:37
ՀՀ կառավարությունն այսօրվա նիստում բացասական եզրակացության արժանացրեց ԱԺ «Ելք» խմբակցության պատգամավոր Էդմոն Մարուքյանի ներկայացրած՝ ՀՀ Քրեական օրենսգրքում փոփոխությունների կատարելու մասին օրենքի նախագիծը:
Նախագծի զեկուցող, արդարադատության նախարար Արտակ Զեյնալյանը նշեց, որ նախագծով առաջարկվում է ՀՀ քրեական օրենսգրքի 69-րդ հոդվածի 3-րդ մասում կատարել փոփոխություն, համաձայն որի՝ մինչև դատավճռի օրինական ուժի մեջ մտնելը կալանքի տակ պահելու ժամկետը պետք է հաշվակցվի ազատազրկման, կարգապահական գումարտակում պահելու ձևով նշանակված պատժին՝ 1 օրը հաշվելով 1,5 օրվա դիմաց: Նախատեսվում է նաև նախագծին տալ հետադարձ ուժ:
«Նշված իրավակարգավորման առնչությամբ նախևառաջ հարկ ենք համարում անդրադառնալ առաջադեմ երկրների միջազգային փորձի ուսումնասիրության արդյունքներին: Մասնավորապես, ուսումնասիրված երկրներում առկա իրավակարգավորումները պայմանականորեն կարելի է բաժանել երկու խմբի: Առաջին և ճնշող մեծամասնություն են կազմում այն երկրները, որտեղ նշված հարցի կապակցությամբ տրված իրավակարգավորումները համապատասխանում են Հայաստանի Հանրապետության գործող քրեական օրենսգրքի 69-րդ հոդված 3-րդ մասով նախատեսված իրավակարգավորմանը: Այսինքն, նշված երկրներում մինչև դատավճռի օրինական ուժի մեջ մտնելը կալանքի տակ պահելու ժամկետի 1 օրը հավասար է ազատազրկման ձևով նշանակված պատժի 1 օրվան»,- մանրամասնեց նախարարը:
ՀՀ առաջին փոխվարչապետ Արարատ Միրզոյանն էլ նկատեց՝ քանի որ պատգամավոր Էդմոն Մարուքյանը կոմիտեի նիստում նախագծի քննարկմանը ներկա է եղել և հայտնել, որ համաներման նախագծի դեպքում նման փոփոխության անհրաժեշտություն չկա, ուստի նախագծի ընդունման անհրաժեշտություն չկա:
Վարչապետ Նիկոլ Փաշինյանը ևս ընդգծեց՝ քանի որ պատգամավորի առաջարկի հիմնական շարժառիթը բանտախցերի բեռնաթափումն է, ուստի այդ խնդիրը լուծվում է և հավելյալ քաշքշուկների կարիք չկա:
Մանրամասները՝ տեսանյութում:
