Կառավարությունը որոշումը չի փոխելու. Պռոշյանի բնակիչները կշարունակեն բողոքի ակցիաները

Պռոշյան, Քասախ համայնքների բնակիչների և ՏԿԵ փոխնախարար Արմեն Սիմոնյանի ավելի քան 2,5 ժամ տևած հանդիպումն ավարտվել է, այս մասին Factor.am-ին տեղեկացրեց հանդիպման մասնակից Սերգո Հովհաննիսյանը:

Նրա խոսքով` Կառավարությունը որոշումը չի փոխելու, 25 և 59 համարների ավտոբուսները կհանվեն, իսկ «Մուլտի տրանսպորտ» ընկերության տնօրենը հայտնել է, որ 50 դրամով կէժանացնեն նոր երթուղու տրանսպորտի ուղեվարձը:
««Մուլտի տրանսպորտի» շահերն ավելի շատ էին պաշտպանում, քան`ժողովրդինը: Որոշեցին, որ ավտոբուսի գինը 250 դրամից դարձնում են 200: Ընտանիք կա 4 ուսանող ունի, ամեն օր 200 դրամ գալը ու 200 գնալը ֆինանսական մեծ բեռ է ավելացնում տվյալ ընտանիքի համար»,- մանրամասնեց նա:

Սերգո Հովհաննիսյանը նաև նշեց, որ նոր ավտոբուսները գյուղից հասնելու են մինչև ֆիզիկայի ինստիտուտ, իսկ նախկին երթուղայինը հասնում էր մինչև Հաղթանակի այգի:

Նա հայտարարեց, որ երկու համայնքների բնակիչները շարունակելու են բողոքի ակցիաները:

Հիշեցնենք, որ մարտի 5-ին Կոտայքի մարզի Պռոշյան և Քասախ համայնքների բնակիչները մի քանի ժամ շարունակ փակել էին Երևան-Աշտարակ ճանապարհը։ Նրանք բողոքում են տրանսպորտի 25 և 59 համարների գծերի կրճատման և ավելի թանկ երթուղու սպասարկման դեմ։ Ըստ բնակիչների՝ նոր երթուղին սպասարկելու է «Մուլտի տրանսպորտ» ընկերությունը, իսկ ուղեվճարը լինելու է 200 -250 դրամ։ Բնակիչների խոսքով՝ 25 և 59 համարների ավտոբուսներից օգտվելու դեպքում իրենք վճարում էին 150 դրամ, իսկ «Մուլտի տրանսպորտ» պատկանող թիվ 277 միկրոավտոբուսներից օգտվելու դեպքում ոչ միայն միայն ավելի թանկ պետք է վճարեն, այլ՝ այն սպասարկելու է ընդամենը 7 կմ՝ մինչև ֆիզիկայի ինստիտուտ։

Մանյա Պողոսյան