Երևան-Աշտարակ ճանապարհը մի քանի ժամ փակ մնալուց հետո բացվեց. պռոշյանցիները կհանդիպեն ՏԿԵ փոխնախարարի հետ

Վաղ առավոտից Պռոշյանի և Քասախի բնակիչները փակել էին Երևան-Աշտարակ ճանապարհը։ Նրանք բողոքում են հասարակական տրանսպորտի 25 և 59 համարների երթուղիների կրճատման և ավելի թանկ երթուղու ներդրման դեմ։ Խոսքը Գագիկ Ծառուկյանի «Մուլտիտրանսպորտ» ընկերության մասին է, որը, ըստ բնակիչների, սպասարկելու է 200 և 250 դրամ սակագնով։

«Առանց էդ էլ անմարդկային պայմաններով ենք գնում-գալիս, շախմատի ձի դարձած ենք երթևեկում, հիմա դա էլ են հանում, ո՞նց անենք մենք։ Ժամը 7-ից տրանսպորտ չկա, վարձատրվում են մեր վճարած հարկերով ու, ստացվում ա, սահմանափակում են մեր աշխատանքը։ Մինչև հարցը վերջնական որոշվի, թող 25 համարը գա ու գործի»,- Աշտարակի ոստիկանապետին դիմեց ակցիայի մասնակից բնակիչներից մեկը։

Նրանց խոսքով, եթե տրանսպորտի հարցը չլուծվի, մասսայական բոյկոտելու են և չեն օգտվելու երթուղուց. «Ոտքով կգնանք, բայց չենք օգտվի»,- նշեց ակցիայի մասնակիցներից մեկը։ Կարճ ժամանակ անց Երևան-Աշտարակ ճանապարհին կարմիր բերետավորներ բերվեցին, իրավիճակն ավելի լարվեց։

Ոստիկանապետը կրկին բանակցեց ցուցարարների հետ, շուրջ 2 ժամ անց պռոշյանցիները համաձայնվեցին բացել ճանապարհը, քանի որ տեղեկացվեցին՝ մինչև հարցի լուծումը կգործի թիվ 25 համարի երթուղին: Որոշվեց նաև, որ ապրիլի 7-ին պռոշյանցիներին կհանդիպի Տարածքային կառավարման և ենթակառուցվածքների փոխնախարար Արմեն Սիմոնյանը:

«Եթե երկուշաբթի մեր հարցին դրական լուծում չտվեցին, պալատկաները խփելու ենք Նիկոլի տան առաջ, մնանք»,- ասաց բնակիչներից մեկը: Ճանապարհը բացելուց հետո ակցիայի մասնակիցները գնացին համայնքապետարան՝ որոշելու, թե իրենցից ովքեր են մասնակցելու փոխնախարարի հետ հանդիպմանը:

Ռոզա Վարդանյան