ՆԱՏՕ-ի աջակցությամբ ՀՀ ԳԱԱ-ում միջազգային գիտաժողով կանցկացվի

Սույն թվականի մարտի 31-ին՝ ժամը 09:20-ին, ՀՀ գիտությունների ազգային ակադեմիայի նախագահության կլոր դահլիճում (Երևան, Մարշալ Բաղրամյան պողոտա 24, 2-րդ հարկ) կմեկնարկի «Ցածր դոզայով ճառագայթահարման ռիսկերը. ընթացիկ հետազոտություններ և ապագա հեռանկարներ» («Low dose radiation risks: present research and future perspectives») խորագրով միջազգային գիտաժողովը։ Միջոցառումը կազմակերպվում է ՄքՄասթեր համալսարանի (Կանադա) և ՀՀ ԳԱԱ մոլեկուլային կենսաբանության ինստիտուտի նախաձեռնությամբ և իրականացվում է Հյուսիսատլանտյան դաշինքի (ՆԱՏՕ) «Գիտություն հանուն խաղաղության և անվտանգության» ծրագրի աջակցությամբ․ տեղեկացնում են ՀՀ ԳԱԱ-ից։

Գիտաժողովի հիմնական նպատակն է հավաքագրել գիտական տվյալներ, մշակել հնարավոր ուղիներ  ռիսկերի գնահատման, կանխարգելման և նվազեցման համար։ Սա հնարավորություն կտա ձևավորել առավել հստակ մոտեցումներ ճառագայթային պաշտպանության ոլորտում։

Գիտաժողովի հիմնական թեմաներն են՝

• Ցածր դոզայով ճառագայթահարման կենսաբանական ազդեցությունը
• Ռադիոէկոլոգիա
• Էկոթունաբանության և կենսամարկերների դերը ռիսկերի գնահատման մեջ
• Ճառագայթային պաշտպանության ժամանակակից մոտեցումները
• Կարգավորող մարմինների և գիտական համայնքի փոխգործակցության հեռանկարները։

Գիտական զեկուցումներով հանդես կգան առաջատար գիտնականներ ԱՄՆ-ից, Գերմանիայից, Լեհաստանից, Կանադայից, Հայաստանից, Ճապոնիայից, Մեծ Բրիտանիայից,  Նորվեգիայից, Ուկրաինայից, Ֆրանսիայից։

Գիտաժողովի աշխատանքները կշարունակվեն մինչև ապրիլի 2-ը ներառյալ։

Գիտաժողովի աշխատանքային լեզուն անգլերենն է։