Factor.am-ի հրապարակման հիման վրա ԿԿՀ-ն վարույթ է հարուցել

Կոռուպցիայի կանխարգելման հանձնաժողովը Factor.am-ի «Արտաշատի համայնքապետը հողամասեր է գնել ու ինքն իրեն թույլտվություն տվել եղած շինությունները քանդելու վերաբերյալ» հրապարակման ուսումնասիրությունից հետո վարույթ է հարուցել Արտաշատի համայնքապետ Կառլեն Մկրտչյանի նկատմամբ։ Այս մասին նշվում է Կոռուպցիայի կանխարգելման հանձնաժողովի համապատասխան որոշման մեջ։ 

Հիշեցնենք, որ Factor.am-ը ավելի վաղ գրել էր, որ Արտաշատի համայնքապետ Կառլեն Մկրտչյանը 2023 թվականին հիփոթեքային վարկով 2 հողամաս է գնել նույն համայնքում ու ինքն իրեն թույլտվություն տվել՝ հողամասերի վրայի շինությւոնները քանդելու վերաբերյալ։

Հանձնաժողովի որոշման մեջ նշվում է, որ Կառլեն Մկրտչյանը շահերի բախման վերաբերյալ հայտարարություն չի ներկայացրել ԿԿՀ-ին։

«Ուսումնասիրության ընթացքում ձեռք բերված փաստական տվյալների վերլուծությունից պարզ է դառնում, որ վերոնշյալ որոշման ընդունմամբ Արտաշատ համայնքի ղեկավար Կառլեն Մկրտչյանն իր լիազորությունների շրջանակում կատարել է գործողություն կամ կարող էր կատարել գործողություն, որը առերևույթ հանգեցրել է կամ կարող էր հանգեցնել շահերի բախման իրավիճակի առաջացման, մինչդեռ, որպես քաղաքական պաշտոն զբաղեցնող անձ նա այդ մասին Օրենքով սահմանված կարգով 10-օրյա ժամկետում գրավոր հայտարարություն չի ներկայացրել Հանձնաժողով, այդ կերպ թույլ տալով Օրենքի 33-րդ հոդվածի 7-րդ մասի պահանջի, առերևույթ խախտում»,- նշված է որոշման մեջ։

Անժելա Պողոսյան