25.05.2026 | 13:18
Հղի կնոջ՝ մեքենայից նետվելու դեպքով ամուսինը մեկ ամսով կալանավորվել է
Կպահպանվի՞ արդյոք Կոմիտասի շուկան․ «Ջի Թի Բի Թաուեր»-ը շինթույլտվություն դեռ չի ստացել
Տնտեսություն
17.03.2025 | 17:45
Կոմիտասի շուկայի հարակից տարածքում բազմաֆունկցիոնալ բնակելի համալիրի կառուցման ժամկետները դեռևս պարզ չեն՝ «Յունիոն-Սերվիս» ՍՊ ընկերությունը դեռևս չի ստացել շինարարության թույլտվություն։ Երևանի քաղաքապետարանից Factor.am-ին հայտնեցին, որ ընկերությունը չի դիմել քաղաքապետարան՝ աշխատանքային նախագծի համաձայնեցման և շինարարության թույլտվության տրամադրման հայտով։
2024 թ-ի հոկտեմբերին համաձայնեցվել էր Կոմիտասի պողոտա հ․53/10 հասցեում համալիրի կառուցման էսքիզային նախագիծը, իսկ ավելի վաղ՝ 2024-ի հունիսին, քաղաքապետարանի կողմից տրամադրվել էր նախագծման թույլտվությունը: Ընկերությունը հայտարարել էր, որ Կոմիտասի շուկայի պատմամշակութային շենքն արտաքին միջամտության չի ենթարկվի:
Համալիրի տեսքը այստեղ։
«Յունիոն-Սերվիս» ՍՊԸ-ն, հիշեցնենք, դեռ 2002 թ-ից Կոմիտասի փակ շուկայի սեփականատերն էր։ Ընկերությունը պատկանում էր ՀՅԴ-ական Աշոտ Փափազյանին, իսկ 2022 թ-ի սեպտեմբերին այն ձեռք է բերել «Ջի Թի Բի Հոլդինգսի» սեփականատեր Գրիգոր Տեր-Ղազարյանը՝ ՀՀ նախկին վարչապետ Վազգեն Սարգսյանի եղբոր դստեր՝ Նոնո Սարգսյանի ամուսինը։ Պետական ռեգիստրում որպես ընկերության իրական շահառու Նոնո Սարգսյանն է գրանցված։ Նրանց հիմնադրած ընկերություններին Factor.am-ն անդրադարձել էր դեռ 2023 թ-ին։
2025 թ-ին «Յունիոն-Սերվիս» ընկերությունն անվանափոխվել է և կոչվում է «Ջի Թի Բի Թաուեր» ՍՊԸ։
Տեր-Ղազարյան-Սարգսյան զույգն առաջին անգամ հանրության ուշադրության կենտրոնում հայտնվել է Երասխում մետալուրգիական գործարանի կառուցման նախագծով, որը հետագայում ադրբեջանական ճնշման պատճառով տեղափոխվեց Արարատ բնակավայր։ 2024 թ-ի հունվարին ՀՀ կառավարությունը 3․5 մլրդ դրամ արտոնյալ բյուջետային վարկ է տվել գործարանի կառուցման համար։ Օրերս՝ մարտի 15-ին, վարչապետ Նիկոլ Փաշինյանն այցելել է այդ գործարան և ծանոթացել աշխատանքին։
Գ․ Տեր-Ղազարյանի մասնակցությամբ մեկ այլ աղմկահարույց նախագիծ է «Կասկադ» համալիրի վերնամասի կառուցապատումը։ Նրան պատկանող «Ջի Թի Բի դիվելոփմենթ» ՍՊԸ-ն կոնսորցիումի ներկայացուցիչն է, որը հաղթել է քաղաքապետարանի մրցույթում և իրավունք է ստացել իրականացնել «Կասկադ մշակութային հանգույց» ճարտարապետական նախագիծն ու Կասկադի հարևանությամբ կրկին բազմաֆունկցիոնալ հսկա համալիր կառուցել։
Գայանե Խաչատրյան
