Դատախազի միջնորդությանն ավելի շուտ էի սպասում, ցանկանում են հետագայում ինձ կալանավորել․ Հովիկ Աղազարյան

ԱԺ պատգամավոր Հովիկ Աղազարյանի համար սպասելի էր Գլխավոր դատախազ Աննա Վարդապետյանի միջնորդությունն իրեն անձեռնմխելիություն զրկելու հարցով։ Ըստ նրա՝  ԱԺ-ում վարչապետի արած քաղաքական հայտարարությունը չէր կարող անհետևանք մնալ։

«Դատախազի միջնորդությանն ավելի շուտ էինք սպասում։ Դատախազությունը ցանկանում է ինձ անձեռնմխելիությունից զրկել, որպեսզի հետագայում Հակակոռուպցիոն կոմիտեն միջնորդություն ներկայացնի դատարանին, որպեսզի ինձ կալանավորեն»,- Factor.am-ի հետ զրույցում տեսակետ հայտնեց պատգամավորը։

Ավելի վաղ հայտնել էինք, որ ՀՀ գլխավոր դատախազ Աննա Վարդապետյանը ԱԺ-ին միջնորդել է Հովիկ Աղազարյանին զրկել պատգամավորական անձեռնմխելիությոնից՝ նրա նկատմամբ քրեական հետապնդում հարուցելու համար։ Դատախազությունը ցանկանում է նախկին իշխանական պատգամավորի  նկատմամբ հետապնդում սկսել՝ առանձնապես խոշոր չափով  կաշառքի և պաշտոնատար անձի նկատմամբ ունեցած իրական կամ ենթադրյալ ազդեցությունն օգտագործելու հոդվածներով։

Հիշեցնենք՝ նախորդ տարի նոյեմբերին Հանրայինի եթերում Փաշինյանը հայտարարել էր, որ խնդրանքով դիմել է ԱԺ պատգամավորներ Նարեկ Զեյնալյանին և Հովիկ Աղազարյանին՝ մանդատները վայր դնել:

Նարեկ Զեյնալյանը մանդատն անմիջապես վայր էր դրել, Հովիկ Աղազարյանն էլ ասել էր, որ պատգամավորական մանդատը վայր չի դնելու։ Ավելի ուշ Նիկոլ Փաշինյանը ԱԺ-Կառավարություն հարցուպատասխանի ժամանակ ասել էր՝« Ոչ մի րոպե չկասկածեք, որ բոլոր օրինական միջոցները կձեռնարկվեն Հովիկ Աղազարյանին մանդատից զրկելու համար»։

Իսկ ինչպես է իրականացվում պատգամավորին անձեռնմխելիությունից զրկելու գործընթացը և ինչ է սպասվում դատախազի միջնորդագրից հետո։  Պատգամավորներին անձեռնմխելիությունից զրկում են Ազգային ժողովի թե՛ հերթական, թե՛ արտահերթ նիստով, քվեարկությունը գաղտնի է:
Ըստ ԱԺ կանոնակարգ օրենքի 108 հոդվածի՝ 

2. Պատգամավորի նկատմամբ քրեական հետապնդում հարուցելուն կամ նրան ազատությունից զրկելուն համաձայնություն տալու մասին միջնորդագիրը գլխավոր դատախազը ներկայացնում է Ազգային ժողովի նախագահին: Ազգային ժողովի նախագահն այդ մասին անմիջապես տեղեկացնում է միջնորդագրում նշված պատգամավորին, իսկ դրա անհնարինության դեպքում հանդես է գալիս հայտարարությամբ: Միջնորդագրին կցվում է պատգամավորի նկատմամբ քրեական հետապնդում հարուցելուն կամ նրան ազատությունից զրկելուն համաձայնություն տալու մասին Ազգային ժողովի որոշման նախագիծը:
3. Միջնորդագիրը քննարկվում է Ազգային ժողովի առաջիկա հերթական նիստերում հետևյալ կարգով.

1) մինչև քսանական րոպե տևողությամբ ելույթներով հանդես են գալիս գլխավոր դատախազը և միջնորդագրում նշված պատգամավորը, որոնց կարող են հարցեր տրվել.

2) մտքերի փոխանակություն.

3) միջնորդագրում նշված պատգամավորին և գլխավոր դատախազին եզրափակիչ ելույթի համար հատկացվում է մինչև 20 րոպե:

4․Եթե միջնորդագրում նշված պատգամավորը հարցի քննարկման սկզբում Ազգային ժողովի նիստից անհարգելի պատճառով բացակայում է, ապա հարցը քննարկվում է առանց նրա մասնակցության:

5. Պատգամավորի նկատմամբ քրեական հետապնդում հարուցելուն կամ նրան ազատությունից զրկելուն համաձայնություն տալու մասին Ազգային ժողովի որոշումն ընդունվում է գաղտնի քվեարկությամբ:
6. Ազգային ժողովի նախագահը պատգամավորի նկատմամբ քրեական հետապնդում հարուցելուն կամ նրան ազատությունից զրկելուն համաձայնություն տալու մասին Ազգային ժողովի որոշումն ստորագրում և հրապարակում է անհապաղ:

Տեղեկացնենք, որ ԱԺ առաջիկա լիագումար նիստը մարտի 25-ին է, ըստ ամենայնի, Աննա Վարդապետյանը ԱԺ  նիստերի օրն էլ կգա խորհրդարան՝ Աղազարյանին զրկելու պատգամավորական անձեռնմխելիությունից։

Հավելենք նաև, որ պատգամավորին անձեռնմխելիությունից զրկելու համար անհրաժեշտ է խորհրդարանականների ձայների մեծամասնությունը, իսկ իշխող թիմի ձայները բավարար են:


Մանյա Պողոսյան