Սկանդալային ձայնագրության հետքերով՝ «Մայր Հայաստան» խմբակցության անդամները «Երևանի ավտոբուս» ՓԲԸ-ում են

Երեկ հրապարակված սկանդալային ձայնագրություններից հետո այսօր Երևանի ավագանու «Մայր Հայաստան» խմբակցության անդամները «Երևանի ավտոբուս» ՓԲԸ են գնացել։ Խմբակցության անդամ Գևորգ Ստեփանյանը Factor.am-ին փոխանցեց, որ որևէ մեկն իրենց չի ընդունել, ընկերության դարպասները փակ են։

«Մենք մի քանի օր առաջ «Երևանի ավտոբուս» ՓԲԸ-ում հանդիպեցինք խոսնակի և գլխավոր ինժեների հետ, որոնք մեզ վստահեցրին, որ ավտոբուսի վարորդներին չվարելու հրահանգ չեն տվել, իրավունք էլ չունենք այդպիսի հրահանգ տալ։ Բայց, փաստորեն, ապօրինի հրահանգը եղել է, բացի այդ՝ նաև վիրավորել են ուղեվարձը չվճարող քաղաքացիներին։ Վիրավորելու համար պիտի պատասխան տան»,- ասաց ավագանու ընդդիմադիր անդամը։

Հիշեցնենք՝ երեկ համացանցում ձայնագրություններ տարածվեցին ավտոբուսի վարորդների և «Երևանի ավտոբուս» ՓԲԸ-ի ղեկավար անձնակազմի միջև տարբեր խոսակցություններից։ Դրանց մեծ մասը վերաբերում է քաղաքացիների կողմից ուղեվարձը չվճարելու դեպքում ավտոբուսը չվարելու հրահանգին, որոնք ուղեկցվում են կոշտ ձևակերպումներով։ «Երևանի ավտոբուս» ՓԲԸ-ից և քաղաքապետարանից դեռևս չեն մեկնաբանել տեղի ունեցածը։ «Երևանի ավտոբուս» ՓԲԸ-ի խոսնակ Գեղամ Ասատրյանը նույնպես երեկ Factor TV-ի հետ զրույցում չէր մեկնաբանել դրանք։

Ուշագրավ է, որ մինչ այս քաղաքային իշխանությունը պնդում էր, որ վարորդներին չվարելու որևէ հրահանգ չի տրվել, միայն ասվել է, որ ուղևորներին հորդորեն վճարել ուղեվարձը։ Հրապարակված ձայնագրությունները հակասում են մինչ այս հնչած բոլոր պնդումներին։

Արփի Հակոբյան