Ադրբեջանի կառավարությունը պահանջել է դադարեցնել BBC-ի ադրբեջանական ծառայության գործունեությունը

Ադրբեջանի կառավարությունը կարգադրել է դադարեցնել Բաքվում BBC-ի ադրբեջանական ծառայության գործունեությունը։ Այսօր հրապարակված հայտարարության մեջ BBC-ն նշում է, որ ընկերությունը «դժկամությամբ որոշում է կայացրել» փակել գրասենյակն Ադրբեջանում՝ երկրի Արտաքին գործերի նախարարությունից բանավոր հրահանգներ ստանալուց հետո:

«Մենք խորապես ափսոսում ենք մամուլի ազատության դեմ ուղղված այս սահմանափակող քայլի համար»,- ասել է BBC-ի ներկայացուցիչը։

Ադրբեջանի ԱԳՆ-ն չի արձագանքել կառավարության որոշումը մեկնաբանելու՝ լրատվամիջոցի խնդրանքին։ BBC-ին միայն բանավոր է տեղեկացվել այս մասին, գրավոր ոչինչ չի ստացվել Ադրբեջանի կառավարությունից։

BBC-ն հայտնում  է, որ Բաքվում իր լրագրողական թիմը դադարեցրել է աշխատանքը, ընկերությունը հետաքննում է հրամանը: Լրատվականը նաև հավելում է, որ կշարունակի հեռարձակվել ադրբեջաներենով։

BBC-ի ադրբեջանալեզու ծառայությունը գործում է 1994 թվականից։ Այն դադարեցրել է ադրբեջանալեզու ռադիոհեռարձակումները 2011 թվականից՝ FM ալիքներով արտասահմանյան ռադիոկայանների հեռարձակումը դադարեցնելու՝ Ադրբեջանի կառավարության որոշումից հետո: Այդ ժամանակից ի վեր BBC-ն ընդլայնել է իր առցանց ներկայությունն ադրբեջաներենով և մեծ լսարան է ձեռք բերել կայքում, ինչպես նաև սոցիալական լրատվամիջոցների հարթակներում:

Հավելենք, որ ավելի վաղ ադրբեջանական իշխանամերձ լրատվամիջոցները հայտնել էին, որ Բաքուն որոշել է փակել Sputnik-Ադրբեջանն ու BBC-ի ադրբեջանական ծառայությունը։

Թարգմանությունը՝ Էմմա Չոբանյանի