12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Բաքուն փակում է Sputnik-ի ադրբեջանական ծառայությունը
Քաղաքականություն
13.02.2025 | 14:04
ՌԴ-ի և Ադրբեջանի միջև լարված հարաբերությունների և Բաքվում «Ռուսական տան» գործունեության դադարեցման ֆոնին՝ Ադրբեջանը հիմա էլ որոշել է փակել Sputnik-ի ադրբեջանական ծառայությունը։ Մասնավորապես, ադրբեջանական Caliber.Az-ը, վկայակոչելով իր հավաստի աղբյուրներից ստացած բացառիկ տեղեկատվությունը, նշում է, որ գոյություն ունեցող անհավասարությունը վերացնելու համար Ադրբեջանը որոշել է որոշակի ճշգրտումներ կատարել երկրում օտարերկրյա լրատվամիջոցների ներկայացուցչությունների և մասնաճյուղերի գործունեության մեջ։
«Այս ճշգրտումները կանդրադառնան, մասնավորապես, Sputnik-Ադրբեջանի վրա, որը երկրում գործում է որպես «Россия сегодня» Միջազգային տեղեկատվական գործակալություն մասնաճյուղ, ինչպես նաև BBC-ի վրա (BBC News Azərbaycanca՝ BBC-ի ադրբեջանական ծառայություն)»,- գրում է լրատվամիջոցը։
Նշվում է, Ռուսաստանում և Ադրբեջանում ադրբեջանական և ռուսական պետական լրատվական գործակալությունների ներկայացվածության մեջ առկա անհավասարությունը վերացնելու համար Ադրբեջանում կաշխատեն «Россия сегодня»-ի նույնքան թղթակիցներ, որքան Ռուսաստանում AzerTac-ի թղթակիցներ կան։ Այս պահին խոսքը միայն մեկ հաստիքի մասին է։
Իշխանական լրատվամիջոցը հայտնում է, որ «Россия Сегодня»-ի Բաքվի մասնաճյուղի աշխատանքներում ներգրավված է մոտ 40 մարդ։ Ակնկալվում է, որ մասնաճյուղը կլուծարվի։ «Россия Сегодня»-ն կշարունակի աշխատել Ադրբեջանում մեկ թղթակցի հետ, որի գործունեությունը կկարգավորվի Ադրբեջանի Հանրապետության օրենսդրությանը և Ռուսաստանի Դաշնության և Ադրբեջանի Հանրապետության կառավարությունների միջև 2001 թվականի հունվարի 9-ին ստորագրված ԶԼՄ-ների թղթակիցների կարգավիճակի մասին համաձայնագրին համապատասխան:
Հիշեցնենք, որ օրերս էլ Ադրբեջանի իշխանությունների պահանջով Բաքվում իր գործունեությունն է դադարեցրել «Ռուսական տունը»։
Թարգմանությունը՝ Էմմա Չոբանյանի
