Դատարանը թույլ կտա՞ Անդրիաս Ղուկասյանին մասնակցել հոր հուղարկավորությանը

87 տարեկան հասակում այսօր մահացել է «Նոր Հայաստան» հանրային փրկության ճակատի անդամ, ընդդիմադիր գործիչ Անդրիաս Ղուկասյանի հայրը՝ Մարատ Ղուկասյանը։ Այս  լուրը Factor.am-ի հետ զրույցում  հաստատեց Անդրիաս Ղուկասյանի պաշտպան Կարեն Մեժլումյանը:

Փաստաբանի փոխանցմամբ՝ Անդրիաս Ղուկասյանը հորը տեսել է մոտ մեկ տարի առաջ՝ մինչ կալանավորումը, նրանք անգամ հեռախոսազանգերով շփվելու հնարավորություն չեն ունեցել:

«Բոլոր մեր միջնորդությունները մերժվել են: Անդրիաս Ղուկասյանը որևէ կապի հնարավորություն չի ունեցել, հայրն այդ փաստն է նաև շատ ծանր տարել :

Դեռևս մի քանի օր առաջ բժշկի փաստաթուղթ եղավ, որ հոր վիճակը շատ ծանր է, կյանքին մնացել են հաշված օրեր: Մենք այդ փաստաթուղթը ներկայացրել էինք քննիչին, որպեսզի կարճաժամկետ տեսակցություն թույլ տան, սակայն քննիչը մերժել էր: Կարծեմ՝ այդ հիվանդության մասին նաև «ԵԼՔ» դաշինքը, երբ դիմել էր գլխավոր դատախազին՝ անձնական երաշխավորություն կիրառելու համար, միջնորդության մեջ այդ մասին էլ նշում կար, բայց նորից մերժվեց »,- նշեց փաստաբանը:

Կարեն Մեժլումյանը հայտնեց, որ դիմել են Երեւանի Էրեբունի եւ Նուբարաշեն վարչական շրջանների ընդհանուր իրավասության դատարան, որպեսզի Անդրիաս Ղուկասյանին թույլ տան մասնակցել հոր հոգեհանգստյան արարողությանը:

Հիշեցնենք՝ երեկ ՀՀ գլխավոր դատախազությունը հայտնեց, որ Անդրիաս Ղուկասյանի վերաբերյալ քրեական գործը մեղադրական եզրակացությամբ ուղարկվել է Երևան քաղաքի էրեբունի և Նուբարաշեն վարչական շրջանների ընդհանուր իրավասության դատարան։ 
Շողիկ Գալստյան