25.08.2026 | 21:32
ՀՀ նախագահն այցելել է ՊԵԿ և քննարկել հարկային համակարգի բարեփոխումները
Արաբները Խաչատուր Սուքիասյանին 109 հազար դրամանոց կուժ են նվիրել
Հասարակություն
29.01.2025 | 12:15
ԱԺ ՔՊ խմբակցության պատգամավոր Խաչատուր Սուքիասյանին արաբները մանուշակագույն ապակյա կուժ են նվիրել։ Խաչատուր Սուքիասյանը ԱԺ Հայաստան-Արաբական Միացյալ Էմիրություններ բարեկամական խմբի ղեկավարն է։ Նվերը ստացել է 2024 դեկտեմբերի 30-ին՝ Նոր տարվա առթիվ, ՀՀ-ում ԱՄԷ դեսպան Նարիման Մոհամմեդ Շարիֆ Աբդուլլա Ալմուլլայի կողմից։
Մանուշակագույն կուժի արժեքը գնահատվել է 109 հազար դրամ։ Այս մասին Factor.am-ը տեղեկանում է բարձրաստիճան անձանց կողմից ստացված նվերների հայտարարագրման ռեեստրից։
Հակակոռուպցիոն կոմիտեի օպերատիվ-հետախուզական վարչության աշխատակից Արման Սարգսյանն էլ, նույն աղբյուրի համաձայն, դեկտեմբերի 28-ին 171 հազար դրամ արժողությամբ ժամացույց է նվեր ստացել։ Այն «Գնոմոն» տեսակի արծաթյա ժամացույց է։
Հիշեցնենք՝ «Հանրային ծառայության մասին» օրենքում կատարված փոփոխությունների արդյունքում սահմանվել են նվերներ ընդունելու վերաբերյալ նոր կանոններ։ Ըստ այդ կարգավորումների՝ պետությանը կամ համայնքին են հանձնվում պետական, պաշտոնական այցերի, միջոցառումների, ինչպես նաև աշխատանքային այցերի, գործուղումների շրջանակում տրվող նվերները, եթե դրանց արժեքը գերազանցում է 60.000 ՀՀ դրամը:
Խաչատուր Սուքիասյանի օգնականը փոխանցեց, որ նվեր ստացած կուժը փոխանցվել է ՀՀ Ազգային ժողովի թանգարանին։
Նարեկ Կիրակոսյան
