29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
Մոսկվայում Ադրբեջանի դեսպանը ՌԴ ԱԳՆ է կանչվել
Քաղաքականություն
28.01.2025 | 11:13
ՌԴ ԱԳ փոխնախարար Միխայիլ Գալուզինը նախօրեին Ռուսաստանի ԱԳՆ է հրավիրել Մոսկվայում Ադրբեջանի արտակարգ ու լիազոր դեսպան Ռահման Մուստաֆաևին։ Ռուսաստանի ԱԳՆ-ի փոխանցմամբ՝ ռուսական կողմն ընդգծել է ՌԴ-ի և Ադրբեջանի միջև հարաբերությունների կառուցման կարևորությունը ռազմավարական գործընկերության և դաշնակցային ոգով՝ 2022 թվականի փետրվարի 22-ին ամենաբարձր մակարդակով ստորագրված հռչակագրի հիման վրա՝ երկու պետությունների ազգային շահերից ելնելով:
«Այս կապակցությամբ տարակուսանք է արտահայտվել ադրբեջանական լրատվամիջոցներում վերջերս մի շարք հակառուսական ուղղվածության հրապարակումների, ինչպես նաև Բաքվում «Ռուսական տան» դեմ ապատեղեկատվական արշավի առնչությամբ։ Նշվել է առաջադրված մեղադրանքների բացարձակ անհիմն լինելը»,- ասվում է հայտարարության մեջ։
Ղազախստանի Ակտաուի մոտակայքում 2024 թվականի դեկտեմբերի 25-ին «Ադրբեջանական ավիաուղիներ»-ի ինքնաթիռի կործանման թեման քննարկելիս ընդգծվել է պաշտոնական հետաքննության ավարտի և դրա արդյունքների հրապարակման անհրաժեշտությունը՝ պարզելու ողբերգության բոլոր հանգամանքները։
Հիշեցնենք, որ օրերս ադրբեջանական իշխանամերձ լրատվամիջոցը հայտնել էր, որ ինքնաթիռի կործանման դեպքի առթիվ Ռուսաստանում անցկացված քրեական գործի հետաքննությունը հաստատել է, որ օդանավը խոցվել է «Պանցիր Ս-1» հակաօդային պաշտպանության համակարգով։ Ըստ ադրբեջանական կառավարության իրազեկ աղբյուրների՝ եթե Ռուսաստանը փորձի փակել գործը և չհրապարակի հետաքննության արդյունքները, ապա Բաքուն կդիմի միջազգային իրավական կառույցներին։
Բացի այդ, ադրբեջանական Baku TV հեռուստաալիքը հրապարակել էր ռեպորտաժ, որում Բաքվի «Ռուսական տանը» մեղադրում էր մշակութային և հումանիտար աշխատանքի քողի տակ հակաադրբեջանական լրտեսական գործունեության իրականացման մեջ։
Թարգմանությունը՝ Էմմա Չոբանյանի
