25.05.2026 | 23:41
Գյումրիի արտահերթ ընտրություններ ենք իրականացնելու. Նիկոլ Փաշինյան. ՏԵՍԱՆՅՈՒԹ
Աֆղանստանի փոխարտգործնախարարը կոչ է արել թույլատրել կանանց կրթությունը
Քաղաքականություն
20.01.2025 | 22:18
Աֆղանստանի արտաքին գործերի փոխնախարար Շեր Մոհամմադ Աբբաս Ստանիկզայը կոչ է արել «Թալիբան» շարժման առաջնորդներին վերացնել աղջիկների և կանանց կրթության արգելքը։ Ելույթ ունենալով Խոստ նահանգի կրոնական դպրոցում՝ փոխնախարարն ասել է, որ արգելքի համար որևէ հիմնավորում չկա: Ըստ նրա՝ նախկինում նման արգելք չի եղել, և դա որևէ խնդիր չի առաջացրել, փոխանցում է The Times of India-ն։
Ստանիկզայը կարծիք է հայտնել, որ նման արգելք սահմանելով՝ երկրի իշխանությունները անարդարություն են գործում երկրի 40 միլիոն բնակչությունից 20 միլիոն մարդու նկատմամբ՝ զրկելով նրանց կրթության իրավունքից։ 2021 թվականի օգոստոսին տեղի ունեցած իշխանափոխությունից հետո Աֆղանստանը մտցրել է տարանջատված կրթություն և բուհերի առանձին մուտքեր տղամարդկանց և կանանց համար: 2021 թվականի սեպտեմբերին աղջիկներին արգելվեց հաճախել դպրոց մինչև հետագա ծանուցում։ 2022 թվականի դեկտեմբերին իշխանությունները պահանջել են Աֆղանստանի համալսարաններին դադարեցնել դասերը աղջիկների համար մինչև հետագա ծանուցումը:
Թարգմանությունը՝ Տաթև Ֆռանգյանի
