Թրամփը չի բացառել Գրենլանդիան և Պանամայի ջրանցքը ուժով վերցնելու հնարավորությունը

ԱՄՆ նորընտիր նախագահ Դոնալդ Թրամփը չի բացառել ռազմական կամ տնտեսական միջոցների կիրառումը Պանամայի ջրանցքի և Գրենլանդիայի ձեռքբերման համար, ինչը հանդիսանում է ավելի լայն ընդլայնողական օրակարգի մաս, որը նա առաջ է քաշել նոյեմբերի 5-ի ընտրություններում հաղթելուց հետո:

Թրամփը, որը պաշտոնը կստանձնի հունվարի 20-ին, նաև հանդես է եկել Կանադան ԱՄՆ-ի նահանգի վերածելու գաղափարով՝ հայտարարելով, որ ՆԱՏՕ-ի դաշնակիցներից շատ ավելի մեծ պաշտպանական ծախսեր կպահանջի, նաև խոստացել է փոխել Մեքսիկական ծոցի անունը Ամերիկյան ծոցով:

Պաշտոնը ստանձնելուն դեռ երկու շաբաթ է մնացել, իսկ Թրամփը սկսել է ուրվագծել ագրեսիվ արտաքին քաղաքականություն՝ չնկատելով դիվանագիտական նկատառումները կամ ԱՄՆ դաշնակիցների մտահոգությունները, գրում է Reuters-ը:

Ֆլորիդայի իր հանգստավայրում հրավիրված ասուլիսի ժամանակ հարցին՝ արդյո՞ք նա կարող է աշխարհին հավաստիացնել, որ չի կիրառի ռազմական կամ տնտեսական պարտադրանք՝ փորձելով վերահսկողություն հաստատել Պանամայի ջրանցքի և Գրենլանդիայի վրա, Թրամփը պատասխանել է․ «Չեմ կարող բացառել այդ երկուսից և ոչ մեկը, բայց կարող եմ ասել, որ դրանք մեզ պետք են տնտեսական անվտանգության համար»:

Թրամփը քննադատել է կանադական ապրանքների վրա ամերիկյան ծախսերը և Կանադային ռազմական աջակցությունը՝ ասելով, որ ԱՄՆ-ը դրանից որևէ օգուտ չի ստանում, իսկ երկու երկրների միջև սահմանն անվանել է «արհեստականորեն գծված գիծ»։

Նա հայտարարել է, որ մաքսատուրքեր կսահմանի Դանիայի համար, եթե այն դիմադրի Գրենլանդիան գնելու իր առաջարկին, որը, ըստ նրա, կենսական նշանակություն ունի ԱՄՆ ազգային անվտանգության համար:

Ի դեպ, ԱՄՆ նորընտիր նախագահի որդին՝ Դոնալդ Թրամփ կրտսերը, մասնավոր այցով ժամանել է Գրենլանդիա։

Հիշեցնենք, որ Թրամփը հունվարի 6-ին Truth Social-ում գրել էր, որ «եթե Կանադան միավորվի ԱՄՆ-ի հետ», երկու երկրներն էլ կշահեն: Դեռևս նոյեմբերի վերջին նա հայտարարել էր Կանադայից ներմուծման 25 տոկոս մաքսատուրքերի մասին։

Թարգմանությունը՝ Տաթև Ֆռանգյանի