Ֆրանսիայում սկսվել է նախկին նախագահ Նիկոլա Սարկոզիի դատավարությունը․ նա մեղադրվում է Քադաֆիի հետ համաձայնության գալու մեջ

Փարիզում մեկնարկել է Ֆրանսիայի նախկին նախագահ Նիկոլա Սարկոզիի գործով դատավարությունը։ Նա մեղադրվում է 2000-ականների կեսերին Լիբիայի բռնապետ Մուամմար Քադաֆիի հետ կոռուպցիոն դավադրության մեջ: Եթե Սարկոզիին մեղավոր ճանաչեն, նրան կարող է սպառնալ մինչև 10 տարի ժամկետով ազատազրկում։ Դատավարությունը կտևի երեք ամիս, գրում է France 24-ը։

Ըստ քննիչների՝ 2005 թվականին Սարկոզին և նրա աշխատակազմը համաձայնության են եկել Քադաֆիի հետ և 2006-2007 թվականներին նրանից ստացել են առնվազն 50 միլիոն եվրո, որը Սարկոզին օգտագործել է իր նախընտրական արշավը ֆինանսավորելու համար։ Դրա դիմաց Ֆրանսիան հանդես է եկել հօգուտ Քադաֆիի ռեժիմի, թեև այն մեկուսացված էր միջազգային հարթակում:

Սարկոզիին «պասիվ կոռուպցիայի», «հանցավոր դավադրության», «նախընտրական քարոզարշավի անօրինական ֆինանսավորման» և «հանրային միջոցների յուրացումը թաքցնելու» մեղադրանքներ են առաջադրվել։ Նախկին նախագահը հերքում է իր մեղավորությունը և հետաքննության ներկայացրած փաստաթղթերը որակում է կեղծված։

Սա Սարկոզիի արդեն երրորդ դատավարությունն է։ 2021 թվականին դատարանը նրան դատապարտել է երկու անգամ․ մեկից երեք տարի ազատազրկման (երկուսը՝ պայմանական, մեկը՝ տնային կալանք)՝ կոռուպցիայի և պաշտոնատար անձին կաշառելու փորձի հոդվածով, երկրորդը՝ նախընտրական քարոզարշավի ապօրինի ֆինանսավորման համար։ Ըստ այդմ՝ նախկին նախագահը ստացել է մեկ տարվա ազատության սահմանափակում (վեց ամիս ազատազրկում, վեց ամիս պայմանական), սակայն դատավճիռը ներկայում բողոքարկվում է։

Թարգմանությունը՝ Տաթև Ֆռանգյանի