20.02.2026 | 02:07
Ադելիա Պետրոսյանը մեդալ չնվաճեց ձմեռային Օլիմպիական խաղերում
Բաքուն 12 տարի անց պատրաստվում է վերաբացել Սիրիայում Ադրբեջանի դեսպանատունը
Քաղաքականություն
30.12.2024 | 12:34
Ադրբեջանական պատվիրակությունը երկրի ԱԳ փոխնախարար Յալչին Ռաֆիևի գլխավորությամբ այցելել է Սիրիա, որտեղ հանդիպել է այդ երկրի անցումային կառավարության արտաքին գործերի նախարար Ասադ Հասան ալ-Շիբանիի հետ։
Ադրբեջանի ԱԳՆ-ի փոխանցմամբ՝ ադրբեջանական կողմը Սիրիայի ղեկավարությանը շնորհավորել է «երկրում պետական կայունության և բնակչության բարեկեցության ճանապարհին նոր փուլ սկսելու, ինչպես նաև ժողովրդի ներկայացուցիչների իշխանության գալու կապակցությամբ»։ Նշվել է, որ Ադրբեջանը Թուրքիայի հետ այդ կարևոր փուլում Սիրիայի կողքին է և պատրաստ է հնարավոր աջակցություն ցուցաբերել երկրի վերականգնման գործընթացում։ Ընդգծվել է նաև, որ Ադրբեջանը անհրաժեշտ դիվանագիտական աջակցություն կցուցաբերի Սիրիայի նոր կառավարությանը։
Կողմերն իրենց հանձնառությունն են հայտնել Ադրբեջանի և Սիրիայի հարաբերություններում նոր էջ բացելու հարցում՝ ուղղված համագործակցությանն ու բարեկամությանը, որը երկար ժամանակ բացակայում էր։
Նշվել է, որ Բաքուն ծրագրում վերսկսել Դամասկոսում Ադրբեջանի դեսպանատան գործունեությունը 12-ամյա ընդմիջումից հետո։
Սիրիայի ԱԳ նախարարին Ադրբեջան այցի հրավեր է փոխանցվել, որը նա ընդունել է։
Թարգմանությունը՝ Էմմա Չոբանյանի
