Քաղաքականություն
27.12.2024 | 11:45
Ռուսական կողմը պետք է ներողություն խնդրի ադրբեջանական քաղաքացիական օդանավի վրա հակաօդային պաշտպանության միջոցներով հարձակման համար։ Այս մասին հայտարարել է Ադրբեջանի խորհրդարանի պատգամավոր Ռասիմ Մուսաբեկովը ադրբեջանական Turan-ին տված հարցազրույցում։
Ի դեպ, Մուսաբեկովն ադրբեջանցի առաջին պաշտոնյան է, որը հրապարակային արձագանքել է ադրբեջական օդանավը ռուսական ՀՕՊ-ով խոցելու մասին հրապարակումներին, այն էլ՝ ընդդիմադիր լրատվամիջոցի հետ զրույցում։
«Ինքնաթիռը խոցվել է Ռուսաստանի տարածքում՝ Գրոզնիի երկնքում։ Եվ դա անհնար է հերքել»,- ասել է Միլլի Մեջլիսի միջազգային հարաբերությունների հանձնաժողովի անդամ Ռասիմ Մուսաբեկովը։
Նրա խոսքով՝ Ռուսաստանում որոշ մարդիկ լրատվամիջոցներում որոշակի գործողություններ են անում՝ իրենց հետքերը կոծկելու համար, սակայն դրա փոխարեն, ըստ պատգամավորի, ռուսական կողմը պետք է ստեղծված իրավիճակին համարժեք գործի և ներողություն խնդրի։
«Նրանք, ովքեր դա արել են, պետք է քրեական պատասխանատվության ենթարկվեն, անհրաժեշտ է փոխահատուցում վճարել զոհերի ու տուժածների համար։ Եթե դա տեղի չունենա, ապա հարաբերությունները, անշուշտ, կտեղափոխվեն այլ հարթություն»,- ասել է Մուսաբեկով։
Նա հիշեցնել է՝ երբ 2020 թվականին 44-օրյա պատերազմի ընթացքում Ադրբեջանը Հայաստանի տարածքում ռուսական ռազմական ուղղաթիռ էր խոցել, ներողություն էր խնդրել, փոխհատուցում վճարել և հայտարարել, որ մեղավորները կենթարկվեն պատասխանատվության։
«Այդպիսին են քաղաքակիրթ հարաբերությունները։ Եթե հակաօդային պաշտպանությունն աշխատում է, ուրեմն օդանավակայանը պետք է փակել, ծանուցում տալ, որ այնտեղ չթռչեն։ Ուստի մեղավորները պետք է պատասխանատվության ենթարկվեն»,- հայտարարել է պատգամավորը։
Հավելենք, որ ավելի վաղ Euronews-ն ու Reuters-ը, ադրբեջանական կառավարական աղբյուրներին վկայակոչելով, հայտնել էին, որ ադրբեջանական օդանավը խոցվել է ռուսական ՀՕՊ համակարգի կողմից։
Ռուսական կողմը տարածվող այս լուրերը դեռևս պաշտոնապես չի մեկնաբանել։
Թարգմանությունը՝ Էմմա Չոբանյանի
