20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Հ1-ը Գարեգին Բ-ի ամանորյա ուղերձի հրապարակման ժամը որոշել է առանց Մայր Աթոռի հետ քննարկումների
26.12.2024 | 16:57
Ամենայն Հայոց կաթողիկոսի ամանօրյա ուղերձը Հանրային ՀԸ-ով հեռարձակելու մասին Factor.am-ի հրապարակումից հետո Մայր Աթոռի տեղեկատվական համակարգը հայտարարություն է տարածել՝ պարզաբանելով, որ Հանրային հեռուստաընկերության ամանորյա հեռուստահաղորդումների ծրագրում Ամենայն Հայոց Կաթողիկոսի ամանորյա ուղերձը դեկտեմբերի 31-ին՝ ժամը 21:55-ին հեռարձակելը համաձայնեցված չէ Մայր Աթոռի հետ։
Հիշեցնենք՝ Factor.am-ը երեկ հղում անելով Առաջին ալիքի եթերացանկին գրել էր, որ կաթողիկոսի ուղերձը ՀԸ-ն նախատեսում է հեռարձակել լուրերի թողարկումից հետո։ Այդ ժամանակահատվածում են հեռարձակվելու նաև ՀՀ նախագահի և ԱԺ նախագահի ուղերձները։
Մայր Աթոռը մինչև երեկ անարձագանք էր թողել Factor.am-ի հարցադրումները, թե ուղերձի հեռարձակման առնչությամբ ինչ որոշում կա, իսկ Առաջին ալիքից գրավոր հարցում են խնդրել, ինչն արդեն ուղարկված է։ Այսօր Մայր Աթոռի հաղորդագրության մեջ կարդում ենք․
«Հարկ ենք համարում նշել, որ ուղերձի հեռարձակման առնչությամբ Մայր Աթոռ Սուրբ Էջմիածնի և Հանրային հ/ը միջև որևէ քննարկում տեղի չի ունեցել։ Հեռուստաընկերությունը շարունակում է շրջանցել Ամենայն Հայոց Կաթողիկոսների ամանորյա ուղերձի հեռարձակման՝ տասնամյակների ավանդույթը՝ անտեսելով Մայր Աթոռի դիրքորոշումն ու Հայոց Եկեղեցու հայրենաբնակ և աշխարհասփյուռ հավատացյալների պահանջներն ու սպասումները։ Հեռուստաընկերության որդեգրած գործելաոճի պայմաններում Մայր Աթոռը նպատակահարմար չի նկատում Հանրայինի եթերով Ամենայն Հայոց Հայրապետի ուղերձի հեռարձակումը։ Ամենայն Հայոց Կաթողիկոսի ուղերձը մեզ հասանելի լրատվամիջոցներով կհեռարձակվի Ամանորի գիշերը՝ նախընթաց տարիների ավանդույթով սահմանված ժամին»։
Նշենք, որ հեռուստաընկերությունը նախորդ տարվանից է սկսել Գարեգին Բ-ի ուղերձը չհեռարձակել տարեմուտից րոպեներ առաջ: Առաջին ալիքը սա բացատրում է այն հանգամանքով, որ օրենսդրական կարգավորում այդ մասով չկա, սակայն, շատերը սա կապում են Գարեգին Բ-ի քաղաքական դիրքորոշման հետ։ Նարեկ Կիրակոսյան
