14.05.2026 | 11:15
Ընտրակաշառք տալու գործով երեկ ձերբակալված անձանցից երկուսը կալանավորվել են, մեկի նկատմամբ կիրառվել է տնային կալանք
Հ1-ը Գարեգին Բ-ի ուղերձի հեռարձակման ժամ է որոշել․ արդյո՞ք այն համաձայնեցված է Մայր Աթոռի հետ
Քաղաքականություն
25.12.2024 | 17:28
Այս տարի Հանրային ՀԸ-ն Ամենայն Հայոց կաթողիկոս Գարեգին Բ-ի ամանօրյա ուղերձը նախատեսում է եթեր հեռարձակել դեկտեմբերի 31-ին՝ ժամը 21:55-ին։ Այս մասին Factor.am-ը տեղեկանում է Առաջին ալիքի կայքում տեղադրված ծրագրային ցանկից։
Factor.am-ը երեկ Հանրային ՀԸ-ից՝ հետաքրքրվել էր, թե այս տարի արդյո՞ք հեռարձակվելու է Գարեգին Բ-ի ուղերձը, թե՝ ոչ։ Կառույցից առաջարկել էին գրավոր հարցում ուղարկել, ինչի պատասխանը դեռ չենք ստացել։ Այսօր արդեն Factor.am-ն արձանագրեց, որ Հանրայինի կայքում հոգևոր առաջնորդի ուղերձի համար նախատեսված եթերաժամանակ կա։
Հիշեցնենք՝ նախորդ տարի Առաջին ալիքի եթերում Գարեգին Բ-ի ուղերձը չհրապարակվեց։ Պատճառն այն էր, որ ՀԸ-ն ավանդական դարձած եթերաժամանակը փոխել էր՝ առաջարկելով, որ այն հեռարձակվի լրատվական թողարկման ընթացքում։ Մինչ այդ կաթողիկոսի խոսքը հեռարձակվում էր վարչապետի, իսկ նախկինում նախագահի ուղերձից առաջ։ Այս փոփոխությունը Հանրայինը նախորդ տարի բացատրել էր այն հանգամանքով, որ օրենսդրական կարգավորում չկա կաթողիկոսի ուղերձի հեռարձակման մասով։ Սակայն, ակնհայտ էր, որ նման որոշումը կայացվել էր եկեղեցի-քաղաքական իշխանություն տարաձայնությունների պատճառով։ Գարեգին Բ-ն միացել էր Փաշինյանի հրաժարականի պահանջին և անխնա քննադատում էր նրան։
Վերադառնալով ուղերձի հեռարձակմանը։ Առայժմ անհայտ է մնում՝ արդյո՞ք այս հեռարձակման ժամանակն ընտրվել է երկու կողմերի միջև համաձայնության արդյունքում, թե՝ ՀԸ-ն սեփական նախաձեռնությամբ եթերաժամանակ է հատկացրել։ Մայր Աթոռից երեկ Factor.am-ին հայտնել էին, թե քննարկումներ կան, իսկ այսօր հեռախոսազանգերն անպատասխան թողեցին։ Առաջին ալիքի հանրային կապերի պատասխանատուն ևս մեր զանգերին չպատասխանեց։
Նարեկ Կիրակոսյան
