Շարունակելու եմ պայքարել հայ գերիների ազատ արձակման, ՀՀ տարածքային ինքնաիշխանության համար․ Ֆրենկ Փալոն

ԱՄՆ Կոնգրեսի Ներկայացուցիչների պալատի անդամ, Կոնգրեսի հայկական հարցերով հանձնախմբի համանախագահ Ֆրենկ Փալոնը, որն օրերս Բաքվում էր՝ մասնակցելու COP29-ին, հայտարարության է տարածել Ադրբեջանում իր դեմ իրականացված արշավի կապակցությամբ։ Նշվում է, որ կոնգրեսական Փալոնը վերադարձել է Բաքվից, որտեղ Ադրբեջանի կառավարության կողմից հովանավորվող բողոքի ցույցերն ուղեկցել են նրան և՛ COP 29-ում, և՛ հյուրանոցում, որտեղ նա իջևանել էր:

Ադրբեջանի նախագահ Իլհամ Ալիևը Փալոնին բացառել է Կոնգրեսի երկկուսակցական անդամների հետ հանդիպումից։ Ըստ հայտարարության՝ Փալոնը հետևողականորեն հանդես է եկել տարածաշրջանային խաղաղության օգտին և դատապարտել Ադրբեջանի ռազմական հարձակումն ու հայերի էթնիկ զտումները Լեռնային Ղարաբաղում:

«Վրդովեցուցիչ է և շատ խոսուն, որ նախագահ Ալիևը փորձում է լռեցնել ԱՄՆ Կոնգրեսի անդամներին և կանխել հայ ժողովրդի համար մարդու իրավունքների և արդարության վերաբերյալ քննադատական ​​քննարկումները՝ նույնիսկ փակ դռների հետևում։ Ինձ խեղդելու ջանքերը միայն ամրապնդում են իմ վճռականությունը՝ պայքարելու պատասխանատվության, բարեփոխումների և նրանց արժանապատվության համար, որոնք տուժել են Ադրբեջանի ճնշող ռեժիմի ներքո։ Ես կշարունակեմ պայքարել Բաքվում պահվող հայ գերիների ազատ արձակման, Հայաստանի տարածքների ինքնիշխանության պաշտպանության, հայկական հողից ադրբեջանական զորքերի հեռացման ու տարածաշրջանում վերջնական հանգստություն հաստատող արդար և տևական խաղաղության համաձայնագրի համար»,- հայտարարել է Փալոնը։

Նա Ներկայացուցիչների պալատի անդամներին, որոնց թույլատրվել է հանդիպել Ալիևի հետ, խնդրել է բարձրացնել Հայաստանի նկատմամբ ադրբեջանական ագրեսիայի շարունակականության հարցը:

«Ես հպարտ եմ, որ երկկուսակցական պատվիրակությունը նախագահ Ալիևին շեշտել է այն կետը, որ ԱՄՆ կառավարությունը, անկախ կողմերից, չի ցանկանում այլևս հակամարտություն տարածաշրջանում, և որ Ադրբեջանի ու Հայաստանի միջև տարաձայնությունները կարող են լուծվել միայն խաղաղ ճանապարհով»,- ասել է Փալոնը:

Հայտարարության  մեջ նաև շեշտվում է, որ Փալոնի բացառումը հանդիպումից, նրա դեմ ադրբեջանական կառավարության կողմից հովանավորվող բողոքի ակցիաների հետ մեկտեղ, ընդգծում են միջազգային վերահսկողությունից խուսափելու՝ Ադրբեջանի ավելի ու ավելի ագրեսիվ փորձերը։

Հիշեցնենք, որ ԱՄՆ կոնգրեսականի այցը հիստերիա էր առաջացրել ադրբեջանական իշխանամերձ շրջանակներում և ԶԼՄ-ներում։

Թարգմանությունը՝ Էմմա Չոբանյանի