15.11.2024 | 15:58
Ազնի՛վ եղեք, ասեք՝ կա շրջաբերական, էս մղձավանջը կվերջանա, ամեն անգամ ասելու եմ․ Ռուբինյանը՝ ՀՅԴ-ին․ ՏԵՍԱՆՅՈՒԹ
Բայրամովը հայտարարել է, թե Ադրբեջանի Սահմանադրության վերաբերյալ Նիկոլ Փաշինյանի հայտարարությունը «մոլորեցնում է միջազգային հանրությանը»
Քաղաքականություն
15.11.2024 | 13:08
Ադրբեջանի Սահմանադրության վերաբերյալ ՀՀ վարչապետ Նիկոլ Փաշինյանի հայտարարություններն այլ նպատակի չեն ծառայում, քան միջազգային հանրությանը մոլորեցնելը։ Այս մասին հայտարարել է Ադրբեջանի ԱԳ նախարար Ջեյհուն Բայրամովը COP29-ի շրջանակում լրագրողների հետ զրույցում։
«ԱԳՆ խոսնակ Այխան Հաջիզադեի արձագանքում քայլ առ քայլ մատնանշվում է հայկական կողմի հայտարարության անհիմն լինելը»,- հավելել է նա։
Անդրադառնալով մինչև տարեվերջ Ադրբեջանի և Հայաստանի միջև խաղաղության պայմանագրի ստորագրման հավանականությունը՝ Բայրամովն ասել է, որ բանակցային գործընթացը կազմված է երկու բաղադրիչից։
«Դրանցից մեկը ֆիզիկական շփումն է, և դա կարևոր է։ Ներկայում ադրբեջանական պատվիրակության հիմնական ուշադրությունը կենտրոնացած է COP-ի վրա: Այդ պատճառով մինչև դեկտեմբեր հնարավոր չէ դեմ առ դեմ հանդիպումներ անցկացնել։ Դեկտեմբերին կամ հունվարին՝ այլ հարց է։ Կոնկրետ պայմանավորվածություն այս հարցում դեռևս չկա։ Բացի դեմ առ դեմ հանդիպումներից՝ փաստաթղթի վրա աշխատանքները շարունակվում են»,- հավելել է նա:
Խոսելով հաղորդակցությունների բացման համար պայմանավորվածությունների վերաբերյալ հայկական կողմի հայտարարությունների մասին՝ Ադրբեջանի ԱԳ նախարարն ասել է, թե Ադրբեջանի և Հայաստանի միջև տրանսպորտային հաղորդակցությունների բացումը նոր թեմա չէ։
«Երեքուկես տարվա քննարկումներից հետո «ձեռք բերված պայմանավորվածություն» արտահայտությունը համարում ենք ուշացած։ Այս պայմանավորվածությունը պետք է վաղուց ձեռք բերված լիներ։ Եթե այս հարցում դեռ պաշտոնական փաստաթուղթ չկա, եթե Հայաստանն այս ուղղությամբ աշխատանքներ չի սկսել, ապա դեռ բաց հարցեր կան։ Իսկ Ադրբեջանի տարածքում երկար ժամանակ արագ տեմպերով աշխատանքներ են տարվում տրանսպորտային և հաղորդակցությունների ենթակառուցվածքի ստեղծման ուղղությամբ, որն առաջիկայում կհասցվի Հայաստանի հետ սահմանին»,- հայտարարել է Բայրամովը։
Թարգմանությունը՝ Էմմա Չոբանյանի
