Քաղաքականություն
14.11.2024 | 11:31
Ամերիկյան ԶԼՄ-ների տվյալներով՝ Հանրապետական կուսակցությանը հաջողվել է մեծամասնություն ստանալ Ներկայացուցիչների պալատում։ Միևնույն ժամանակ, հայտնի է դարձել ԱՄՆ ընտրված նախագահ Դոնալդ Թրամփի մի շարք նոր նշանակումների մասին։ Սենատոր Մարկո Ռուբիոն կգլխավորի Պետքարտուղարությունը։ Կոնգրեսական Մեթ Գեյցին առաջարկվել է գլխավորել Արդարադատության նախարարությունը, այսինքն՝ դառնալ ԱՄՆ գլխավոր դատախազ, փոխանցում է BBC-ի ռուսական ծառայությունը։
Ավելի վաղ հայտնել էինք, որ Ազգային հետախուզությունը պետք է գլխավորի նախկին կոնգրեսական Թուլսի Գաբարդին, որը ԱՄՆ կոնգրեսական պատվիրակության հետ այցելել էր Հայաստան և Արցախ, քվեարկել հայկական բանաձևերի օգտին, դատապարտել Ադրբեջանի հարձակումը Արցախի դեմ, ինչպես նաև կոչ արել «ճանաչել Ռուսաստանի օրինական մտահոգությունները»՝ կապված ՆԱՏՕ-ին Ուկրաինայի հիպոթետիկ անդամակցության հետ։
ԱՄՆ Կոնգրեսի ստորին պալատի նկատմամբ վերահսկողությունը պահպանելու համար հանրապետականներին անհրաժեշտ էր 218 մանդատ։ Մինչև վերջերս հանրապետականներին երկու մանդատ չէր բավականացնում մեծամասնություն ստանալու համար, սակայն այժմ CBS News-ը կանխատեսում է, որ դա նրանց հաջողվել է։
Որոշ ընտրատարածքներում ձայների հաշվարկը դեռ շարունակվում է. դա պայմանավորված է նրանով, որ որոշ ընտրական հանձնաժողովներ պետք է ուշադիր ստուգեն բոլոր փաստաթղթերը և հաշվիեն փոստով ստացված քվեաթերթիկները։
Այսպիսով, հանրապետականներն այժմ վերահսկում են Կոնգրեսի երկու պալատները. նախագահական ընտրություններից անմիջապես հետո նրանք վերականգնել են վերահսկողությունը Սենատի վրա։
Առնվազն առաջիկա երկու տարվա ընթացքում, այսինքն՝ մինչև հաջորդ ընտրություններ, Դեմոկրատական կուսակցությունը կզրկվի իշխանությունից, և Դոնալդ Թրամփը կարող է հույսը դնել Կոնգրեսի աջակցության վրա՝ իր ծրագրերն իրականացնելու և վարչակազմի առանցքային պաշտոնյաների նշանակման համար։
Թարգմանությունը՝ Տաթև Ֆռանգյանի
