Թուրքիայի ՊՆ ղեկավարը հայտարարել է, որ Թրամփը կարող է ԱՄՆ զորքերը դուրս բերել Սիրիայից

Թուրքիայի ՊՆ ղեկավար Յաշար Գյուլերը հայտարարել է, թե ԱՄՆ նորընտիր նախագահ Դոնալդ Թրամփը կարող է ամերիկյան զորքերը դուրս բերել Սիրիայից։ Այս մասին Գյուլերը հայտարարել է tv100-ին տված հարցազրույցում։

«Իրականում Թրամփն իր նախագահության ընթացքում երեք անգամ հրահանգել է դուրս բերել իր զինվորներին Սիրիայից։ Բայց այն ժամանակ դա ընտրությունների նախօրեին էր, այդպես էլ մնաց։ Իմ գնահատմամբ՝ Թրամփն այս ընթացքում կկենտրոնանա այս հարցի վրա և կարող է ամերիկացի զինվորներին դուրս բերել Սիրիայից և տարածաշրջանից»,- ասել է Թուրքիայի ՊՆ ղեկավարը՝նշելով, որ թուրքական զորքերը չեն հեռանում Սիրիայից։

Հարցին՝ Թրամփի՝ ԱՄՆ նախագահի պաշտոնում ընտրվելը լա՞վ է, թե՞ վատ, Գյուլերը պատասխանել է, որ չի ցանկանում այդ հարցը շահարկել։

«Ես հավատում եմ, որ մեր նախագահները նորից միասին կաշխատեն և, ամեն դեպքում, կարելի է դրական արդյունքների հասնել»,- նշել է նա։

Հարցին էլ՝ արդյո՞ք ակնկալում է Դոնալդ Թրամփի նախագահության երկրորդ ժամկետի ընթացքում F-16-ի և F-35-ի գնման հարցում Թուրքիայի պահանջների բավարարման արագացում, Գյուլերը պատասխանել է, որ ներկայում ամերիկացի գործընկերների հետ հարաբերությունները շատ դրական են, հետընթաց չի լինի։

«Մենք ուզում ենք գնել 40 հատ F-16, և դրանք ձեռք կբերվեն, պայմանագրերը կնքված են։ Մենք կգնենք նաև 40 հատ Eurofighter Typhoon ինքնաթիռ։ Գերմանիան երկար ժամանակ դիմադրում էր, բայց, ի վերջո, ՆԱՏՕ-ում մեր բարեկամների՝  Անգլիայի, Իտալիայի և Իսպանիայի դրական ներդրումով Բեռլինը, ի վերջո, դրական արձագանքեց»,- հայտարարել է Յաշար Գլուլերը։

Թարգմանությունը՝ Էմմա Չոբանյանի