ԵՐԵՎԱՆԻ ԺԱՄԱՆԱԿՈՎ. Վերջին փուլում Քոչարյանն արդեն բացահայտ սպառնալիքների լեքսիկային է դիմում․ Վահան Արծրունի. ՏԵՍԱՆՅՈՒԹ

«Հայաստանում հանցավոր խավի և իրենց սպառած քաղաքական գործիչների անվտանգության միակ երաշխավորը Նիկոլ Փաշինյանն է։ Եթե նա չպնդի, որ իրենք չեն օգտագործում քաղաքական լծակներ՝ այդ մարդկանց հետ հաշվեհարդար տեսնելու համար, հաշվեհարդար կլինի ժողովուրդը։ Նիկոլ Փաշինյանը ժողովրդի և այդ խավի միջև զսպանակող գործառույթ է կատարում՝ որպես վարչապետ և սահմանադրության գարանտ։ Մենք տեսանք, որ «սամասուդը»՝ որպես ապստամբություն, կարող է իրականություն դառնալ մեր երկրում»-Factor.am-ի «Երևանի ժամանակով» զրուցաշարի շրջանակում նման տեսակետ է հայտնում կոմպոզիտոր Վահան Արծրունին։

Նրա խոսքով՝ «սևերի ու սպիտակների» բաժանումը պայմանական կատեգորիա է, և դրա տակ քաղաքական որևէ հիմնավորում չկա։ 

Վահան Արծրունին պնդում է՝ մեր երկրում չկան հակահեղափոխականներ․ «Կա մի խումբ, որն ուներ անսահման հարստանալու հնարավորություն և այսօր զրկվում է դրանից։ Բնականաբար՝ այդ խումբը պատրաստ է տրամադրել կուտակածը, որպեսզի հնարավորինս վերադարձնի ստատուս-քվոն»,-ասում է նա։

Կոմպոզիտորն անդրադառնում է ՀՀ երկրորդ նախագահ Ռոբերտ Քոչարյանի այն հայտարարությանը, թե Նիկոլ Փաշինյանը կփաշմանի, որ որոշել է իր հետ «գլուխ դնել»․

«Այս մարդու խոսքն ուղղակի սպառնալիք է։ նրա միակ ռեսուրսը հափշտակած փողերն են։ Բայց նույնիսկ բիզնեսում ամեն բան չէ, որ փողով է պայմանավորվում։

 «Ինչ կուզեմ՝ կառնեմ»-ը թույլ արգումենտ է քաղաքականության մեջ։ Այդ ամենը աֆեկտիվ գործողության տպավորություն է թողնում։ Վերջին փուլում Քոչարյանն արդեն բացահայտ սպառնալիքների լեքսիկային է դիմում»,-կարծիք է հայտնում մեր զրուցակիցը։

Նրա համոզմամբ՝ վերջին 4 ամսվա ընթացքում Նիկոլ Փաշինյանի գործողություններում որոշակի ալգորիթմ կա․ «Նա անում է մի քայլ, այդ քայլին հակադարձում են, և հակադարձողնեը սկսում են ինքնաբացահայտվել։ Վարչապետը թույլ է տալիս բացել քարտերը, որպեսզի իր շուրջ կոնսոլիդացնի իր համակիրներին։

Ցանկացած մեղադրյալի, «41+5 երեսփոխանների ակումբի» անդամների զեղումներ, բնականաբար, ստեղծում են որոշակի կոնսոլիդացիա, շարունակում են այն աշխատանքը, որը սկսեց Նիկոլ Փաշինյանը»,-նշում է նա։

Մանրամասները՝ տեսանյութում։ 
Աննա Բաբաջանյան