04.06.2026 | 15:18
ՌԴ ԱԳՆ-ն Հայաստանից ապրանքների ներմուծման սահմանափակումները բացատրել է բուսասանիտարական նորմերով
Քյարամյանը հրաժարվել է ցուցմունք տալ Տիգրան Առաքելյանին ենթադրյալ խոշտանգման գործով
Հասարակություն
21.10.2024 | 17:08
ՀՀ քննչական կոմիտեի նախագահ Արգիշտի Քյարամյանը և ՔԿ Երևան քաղաքի քննչական վարչության պետ Ազատ Գևորգյանը հրաժարվել են ցուցմունք տալ քաղաքացի Տիգրան Առաքելյանին ենթադրյալ խոշտանգելու գործով։ Այս մասին Factor.am-ի գրավոր հարցմանն ի պատասխան՝ հայտնել են Գլխավոր դատախազությունից։
Հիշեցնենք՝ 42-ամյա Տիգրան Առաքելյանը դեռևս 2023 թվականի հունիսին հայտարարել էր, որ Արգիշտի Քյարամյանը և Ազատ Գևորգյանն իրեն խոշտանգել ու բռնությունների են ենթարկել Գևորգյանի աշխատասենյակում։
Տնային կալանքի տակ գտնվելու ընթացքում Տիգրան Առաքելյանը Factor TV-ի հետ զրույցում նշել էր, որ իրեն բերման են ենթարկել հունիսի 17-ի առավոտյան, երեք օր գտնվել է անազատության մեջ։ Նա պնդում է՝ իր նկատմամբ բռնություններն ու խոշտանգումներն իրականացվել են 11 ժամ և ուղղորդվել են սեռական բնույթի հայհոյանքներով և սպառնալիքներով։
Այս ահազանգից ավելի քան մեկ տարի անց Factoram-ը գրավոր հարցմամբ Գլխավոր դատախազությունից հետաքրքրվել էր՝ արդյո՞ք գործով անցնող մեղադրյալներ կան, թե՝ ոչ, ՔԿ-ի նշված պաշտոնյաները հարցաքննվե՞լ են և ի՞նչ կարգավիճակ ունեն։
«Տիգրան Առաքելյանի հաղորդման հիման վրա նախաձեռնվել է քրեական վարույթ, որի շրջանակում Տիգրան Առաքելյանն ունեցել է տուժողի դատավարական կարգավիճակ, իսկ Ձեր հարցմամբ նշված պաշտոնատար անձիք, օգտվելով իրենց իրավունքից, հրաժարվել են ցուցմունք տալ»,- ասված է Դատախազության պատասխանում։
2023 թվականի նոյեմբերին Factor TV-ն խորհրդարանում Տիգրան Առաքելյանի հայտարարության վերաբերյալ հարց էր ուղղել Արգիշտի Քյարամյանին՝ արդյո՞ք ծեծի ենթարկել է նրան։
«Ես մանր հերյուրանքները չեմ մեկնաբանում»,- պատասխանել էր նա։
Քննչական կոմիտեից Factor TV-ին ավելի վաղ հայտնել էին, որ Տիգրան Առաքելյանը մեղադրյալի կարգավիճակ ունի, քրեական գործ է հարուցվել միանգամից մի քանի հոդվածներով՝ շորթման և պաշտոնատար անձանց վերաբերյալ արատավորող տեղեկություններ հրապարակելուն օժանդակելու համար։
Նարեկ Կիրակոսյան
