Ալիևը խաղաղության պայմանագրի կնքման Հայաստանի առաջարկն անիրատեսական է անվանել

Ադրբեջանի նախագահ Իլհամ Ալիևն ընդունել է Բաքվում Բելգիայի նորանշանակ արտակարգ և լիազոր դեսպան Ժուլիեն դե Ֆրեյպոնի հավատարմագրերը։ Ադրբեջանական լրատավմիջոցների հաղորդմամբ՝ դեսպանն ասել է, որ Բելգիան շահագրգռված է հայ-ադրբեջանական հարաբերությունների հետ կապված տարածաշրջանային կայունությամբ։ Նշելով կարգավորման հարցում վերջին առաջընթացը՝ դիվանագետը նշել է, որ Բելգիան խրախուսում է այդ ուղղությամբ ձեռնարկվող քայլերը։

Անդրադառնալով Ադրբեջան-Եվրամիություն հարաբերություններին՝ Իլհամ Ալիևը նշել է, որ Բրյուսելն այն վայրն էր, որտեղ Եվրոպական խորհրդի նախագահ Շառլ Միշելի աջակցությամբ հաջողությամբ բանակցություններ էին ընթանում Հայաստանի և Ադրբեջանի միջև, և այնտեղ իսկապես զգալի առաջընթաց է գրանցվել։

Բրյուսելյան հանդիպումներն ամեն կերպ ձախողող Ալիևը հայտարարել է, թե, իբև, «հայկական կողմը որոշել է չշարունակել այս գործընթացը, որը կոչվում է Բրյուսելյան գործընթաց»։ Նա ասել է, թե խաղաղության համաձայնագրի բոլոր կետերն ունեն նույն արժեքը, և դրանք մեկը մյուսից չի կարելի առանձնացնել։ Ալիևը  հայտարարել է, թե «լիովին անիրատեսական է համարում Հայաստանի կառավարության տարօրինակ առաջարկը՝ ստորագրել այն, ինչի շուրջ համաձայնություն է ձեռք բերվել, և չհամաձայնեցված դրույթները պահպանել հաջորդ փուլերի համար»։

«Մադրիդյան սկզբունքները նախատեսում են, որ առանց բոլոր հարցերի շուրջ համաձայնության ոչինչ չի կարող լինել։ Շատ դեպքերում հայկական կողմը, այս առաջարկներն առաջ քաշելով, ցույց է տալիս, որ խաղաղություն է ուզում, բայց նրանք նախապես գիտեն, որ այդ առաջարկները չեն կարող ընդունվել։ Սա ԵԱՀԿ Մինսկի խմբի այն ժամանակվա համանախագահների դիրքորոշումն էր, և մենք մնում ենք այս դիրքորոշմանը։ Ցավոք, նախկին Մինսկի խմբի որոշ անդամներ փոխել են իրենց դիրքորոշումը և պաշտպանում են հայկական ներկայիս անիրատեսական առաջարկը։ Չնայած այս ամենին՝ գործընթացը շարունակվում է»,- ըստ ադրբեջանական կողմի հաղորդագրության՝ ասել է Ալիևը։

Ալիևը նաև ասել է, որ Եվրամիությունը նախկինի պես պետք է չեզոք մնա հայ-ադրբեջանական խաղաղության  գործընթացում։ Ադրբեջանի նախագահը նաև հույս է հայտնել, որ Ադրբեջանի և Բելգիայի երկկողմ հարաբերությունները կզարգանան՝ անկախ հայ-ադրբեջանական օրակարգից։

Թարգմանությունը՝ Էմմա Չոբանյանի