09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
Այդ խոսակցությունն իրականում մեր մասնակցությամբ է. ԱԱԾ տնօրենը՝ սկանդալային ձայնագրության մասին. ՏԵՍԱՆՅՈՒԹ
Քաղաքականություն
11.09.2018 | 16:02
Ուզում եմ հաստատել, որ խոսակցությունն իրականում մեր մասնակցությամբ է. այս մասին այսօր՝ սեպտեմբերի 11-ին հրավիրված մամուլի ասուլիսում հայտարարեց ՀՀ Ազգային անվտանգության ծառայության (ԱԱԾ) տնօրեն Արթուր Վանեցյանը՝ անդրադառնալով իր և ՀՀ Հատուկ քննչական ծառայության (ՀՔԾ) պետ Սասուն Խաչատրյանի զրույցի սկանդալային ձայնագրությանը:
«Մեր այսօրվա հանդիպման նպատակն այն է, որ համացանցում հայտնվել է մի ձայնագրություն, որտեղ խոսում ենք ես և ՀՔԾ պետ Սասուն Խաչատրյանը: Ուզում եմ հաստատել, որ խոսակցությունն իրականում մեր մասնակցությամբ է, և շատ տարօրինակ է, որ գաղտնալսվել է հանրապետության ԱԱԾ տնօրենի և ՀՔԾ պետի խոսակցությունը: Դա մտահոգիչ փաստ է, որի հետ կապված կլինի մանրակրկիտ քննություն և կպարզվի ձայնագրման աղբյուրը»,- ասաց Արթուր Վանեցյանը:
Նրա խոսքով՝ Գլխավոր դատախազությունում արդեն քրեական գործ է հարուցվել և առաջիկայում կիմանանք բոլոր մանրամասները:
Ապա անդրադառնալով խոսակցության օրվան, Վանեցյանը նշեց, որ այն տեղի է ունեցել Ռոբերտ Քոչարյանի դատական որոշման օրը: «Խոսակցությունը լսել եք բոլորդ, չեմ մանրամասնի: Ուղղակի ուզում եմ ասել, որ հաշվի առնելով այն հանգամանքը, որ դատարանի առջև կանգնած էին ՀՀ երկրորդ նախագահ Ռոբերտ Քոչարյանը և ՀԱՊԿ գլխավոր քարտուղար Յուրի Խաչատուրովը, պետք էր 100 տոկոսով համոզված լինել, որ որևէ թերացում, թերություն չկա: Նման քննարկում իմ և պարոն Խաչատրյանի միջև կայացել է, և եղել է զուտ իրավաբանական քննարկում»,- հավելեց Արթուր Վանեցյանը:
Նա պարզաբանեց, որ փորձագիտական կարծիք է ստացել, որը պարզաբանման կարիք է ունեցել. «Նախ՝ նախապատմությունն ասեմ. ստացել եմ մի հաղորդագրություն, փորձագիտական կարծիք, որտեղ եղել է հիմքերի հետ կապված որոշակի պարզաբանման խնդիր: Հաղորդագրությունն ուղարկել եմ պարոն Խաչատրյանին, նա, արդեն որպես իրավաբան, տվել է այդ բացատրությունները հարցի շուրջ»:
Արթուր Վանեցյանը, միաժամանակ, վստահեցրեց, որ այս սկանդալը չի խանգարի իրենց գործունեությանը: «Այն, ինչ մենք անում ենք, այն պայքարը, որը սկսել ենք, շարունակելու ենք, մեզ չի խանգարելու ոչ մի բան: Որևէ խոչընդոտ չի կարող լինել մեր սկսած գործում: Հայաստանից թալանված գումարները վերադարձվելու են հետ, մարդասպանները կանգնելու են դատարանի առջև, և այդ պրոցեսն անկասելի է»,- հայտարարեց Վանեցյանը:
