Գեղարքունիքում ձկնորսները դարձյալ հարձակվել են ջրային պարեկների վրա․  ՔԿ-ն քրեական վարույթ է նախաձեռնել 

Լրատվամիջոցներում տեղեկություններ են տարածվում, որ օրեր առաջ Գեղարքունքի մարզում՝  Սևանում,  ձկնորսները հարձակվել են ջրային  պարեկների վրա, հայհոյել, մետաղյա խողովակով փորձել հարվածել նրանց։ Քննչական կոմիտեի նախագահի մամուլի քարտուղար Գոռ Աբրահամյանը Factor.am-ին հայտնեց, որ ստացվել է հաղորդում, որում նշված հանգամանքները քրեաիրավական դաշտում ստուգելու և իրավական գնահատականի արժանացնելու համար նախաձեռնվել է քրեական վարույթ ՀՀ քրեական օրենսգրքի 297-րդ հոդվածի 2-րդ մասի և 452-րդ հոդվածի առաջին մասի հատկանիշներով։ Աբրահայանի փոխանցմամբ՝  իրրականացվում է նախաքննություն, հարցաքննվել են միջադեպի մասնակից անձինք։

«Իրավասու մարմնից պահանջվել են վերաբերելի տեսագրությունները։ Քրեական վարույթով մեղադրյալի դատավարական կարգավիճակ ունեցող անձ չկա։ Հանգամանքները պարզվում են»,- նշեց իրավապահ կառույցի մամուլի խոսնակը։

Հիշեցնենք՝ 2023-ի դեկտեմբերի 19-ին ևս նմանատիպ դեպք էր գրանցվել։  Ըստ ՔԿ-ի՝ Գեղարքունիքի մարզի ջրային պարեկներն ու ՊՈԱԿ-ի աշխատակիցները Սևանա լճի Նորատուս բնակավայրի հատվածում 2 նավակով ծառայություն են իրականացնելիս եղել, երբ մոտեցել են շուրջ 200 ձկնորսական նավակներ։ Դրանցում դիմակավորված բազմաթիվ անձինք են եղել, որոնք նավերի անձնակազմի հասցեին հնչեցրել են հայհոյանքներ, սպառնացել են հրկիզել նրանց և նավերը, ապա նետել բենզինով լցված շշեր և փայտեր։ Ձկնորսներից ոմանց հաջողվել է բարձրանալ «Սևան ազգային պարկ»-ի նավի վրա․ նրանք ձեռքերով, ոտքերով, տարբեր առարկաներով հարվածել են աշխատակիցներին։

Մանյա Պողոսյան

Նոր կադրեր՝ ձկնորսների հարձակումից․ հարյուրավոր անձանցից մեղադրյալի աթոռին է 5-ը․ ՏԵՍԱՆՅՈՒԹ