12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Նոր կադրեր՝ ձկնորսների հարձակումից․ հարյուրավոր անձանցից մեղադրյալի աթոռին է 5-ը․ ՏԵՍԱՆՅՈՒԹ
Հասարակություն
08.02.2024 | 20:32
Սևանա լճի վրա ձկնորսների կողմից ջրային պարեկներին և «Սևան ազգային պարկ» ՊՈԱԿ-ի ծառայողներին ծեծի ենթարկելու նոր կադրեր է հրապարակել «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը։ Դեպքը տեղի էր ունեցել Գեղարքունիքի մարզի Նորատուս գյուղի հատվածում, անցած տարեվերջին։
Ըստ Քննչական կոմիտեի տարածած հաղորդագրության՝ դեկտեմբերի 19-ին Գեղարքունիքի մարզի ջրային պարեկներն ու ՊՈԱԿ-ի աշխատակիցները Սևանա լճի Նորատուս բնակավայրի հատվածում 2 նավակով ծառայություն են իրականացնելիս եղել, երբ մոտեցել են շուրջ 200 ձկնորսական նավակներ։ Դրանցում դիմակավորված բազմաթիվ անձինք են եղել, որոնք նավերի անձնակազմի հասցեին հնչեցրել են հայհոյանքներ, սպառնացել են հրկիզել նրանց և նավերը, ապա նետել բենզինով լցված շշեր և փայտեր։
Ձկնորսներից ոմանց հաջողվել է բարձրանալ «Սևան ազգային պարկ»-ի նավի վրա․ նրանք ձեռքերով, ոտքերով, տարբեր առարկաներով հարվածել են աշխատակիցներին։
Այս և սրան հաջորդած՝ ջրային պարեկների հետ բախումների մասնակից 26 ձկնորս է ձերբակալվել, նախաձեռնված վարույթով քրեական հետապնդում է հարուցվել դեպքին մասնակից ընդամենը 5 անձի նկատմամբ։ Այս մասին Factor TV-ի հետ զրույցում ասաց Քննչական կոմիտեի մամուլի քարտուղար Գոռ Աբրահամյանը՝ նշելով, որ նրանցից 4-ի նկատմամբ որպես խափանման միջոց է ընտրվել կալանքը, մեկ անձի նկատմամբ կիրառվել է բացակայելու արգելքը։
Հրապարակված կադրերում երևում է, որ ջրային պարեկներին հրահանգվում է մոտորանավակով պտտվելով ալիք ստեղծել՝ դրանով փորձելով տատանել ձկնորսների նավակները։ Դանիել Իոաննսիյանի կարծիքով՝ նման միջադեպի ժամանակ այս հրահանգն այնքան էլ տեղի չէ։
Իսկ վարչապետը շարունակում է խոսել ջրային պարեկային ծառայությունը զարգացնելու մասին։ Այսօր Կառավարության նիստի ժամանակ վարչապետը հայտարարեց, որ 2 նոր մոտորանավակ է գնվել ծառայության համար, որն էապես նպաստելու է ձկնագողության կանխման դեպքերին։ Փաշինյանը նաև արձանագրեց՝ ձկնորսները չեն ցանկանում 1 կգ ձկան համար քվոտայով սահմանված 65 դրամը վճարել։
Իոաննիսյանը հակադարձում է, իսկ ինչո՞ւ պետք է վճարեն, եթե փորձում են բռնությամբ իրենց գործն առաջ տանել և որոշ դեպքերում՝ հաջողում։
Ամեն տարի նոյեմբերի 25-ից դեկտեմբերի 20-ը սիգի որսն արգելվում է, սակայն ձկնորսները դեմ են լինում որոշմանը և շարունակում են տարբեր միջոցներով ձուկ որսալ։ Փաշինյանն այսօրվա նիստին հայտարարեց՝ երրորդ հանրապետության պատմության մեջ առաջին անգամ կառավարությանը հաջողվել է 95 և ավելի տոկոսով բացառել սիգի ապօրինի որսը Սևանա լճում։
Մանրամասները՝ տեսանյութում։
Ռոզա Վարդանյան
