27.05.2026 | 13:38
Սևանի և մի շարք գետերի ավազաններում սպասվում է ջրի ելքերի զգալի մեծացում
Բաքուն կֆինանսավորի Վատիկանին Սուրբ Պողոսի տաճարի վերականգնման համար
Քաղաքականություն
12.09.2024 | 22:03
Վատիկանի նահանգապետության և Ադրբեջանի «Հեյդար Ալիև» hիմնադրամի միջև պայմանագիր է ստորագրվել Սուրբ Պողոսի տաճարի վերականգնման աշխատանքներ իրականացնելու մասին։ Ադրբեջանական լրատվամիջոցների հաղորդմամբ՝ փաստաթուղթը ստորագրել են Ադրբեջանի նախագահի օգնական, «Հեյդար Ալիև» հիմնադրամի գործադիր տնօրեն Անար Ալաքբարովը և Վատիկան քաղաք-պետության նահանգապետության ղեկավար, կարդինալ Ֆերնանդո Վերգես Ալսագան։
Վատիկան այցի շրջանակում ադրբեջանական կողմը հանդիպել է Ալսագայի և մի շարք այլ պաշտոնյաների հետ։ Քննարկվել են Ադրբեջանի և Սուրբ Աթոռի հարաբերությունները, «Հեյդար Ալիև» հիմնադրամի հետ համատեղ նախագծերը։ Ադրբեջանական պատվիրակությունն այցելել է նաև Սուրբ Պողոսի տաճար։
Հավելենք, որ Վատիկանն ու «Հեյդար Ալիև» հիմնադրամը համագործակցում են վաղուց, որն անդրադառնում է նաև Սուրբ Աթոռի դիրքորոշման վրա Ադրբեջանի հետ կապված տարբեր հարցերում։ Ադրբեջանական հիմնադրամի աջակցությամբ Վատիկանում վերականգնվել են բազմաթիվ պատմական հուշարձաններ, խորաքանդակներ ու դամբարաններ։ Դրանց թվում են Սուրբ Մարչելինոյի և Պիետրոյի դամբարանները, որոնք հանրության համար բացվել են 2016 թվականին, նույն թվականին սկսվել են նաև Սուրբ Սեբաստիան տաճարի դամբարանների վերականգնման աշխատանքները։ 2018 թվականի սեպտեմբերին «Հեյդար Ալիև» հիմնադրամի նախագահ, Ադրբեջանի առաջին տիկին ու առաջին փոխնախագահ Մեհրիբան Ալիևան անձամբ է մասնակցել դրանց բացման արարողությանը։
Ադրբեջանի նախագահ Իլհամ Ալիևն ու նրա կինը վերջին անգամ այցով Վատիկանում էին 2020 թվականի փետրվարին։ Նրանց ընդունել էր Հռոմի Ֆրանցիսկոս պապը։ Մեհրիբան Ալիևան պարգևատրվել էր Պիոս պապի ասպետական ուխտի Մեծ խաչ շքանշանով։
Էմմա Չոբանյան
