06.06.2026 | 12:50
«Նման ընտրությունները լեգիտիմ չեն լինի»․ Մեդվեդևը՝ Հայաստանի առաջիկա ընտրությունների մասին
Հսկող տեսախցիկների նախագիծը դեռ երեք ամիս քննարկման փուլում կլինի
06.09.2024 | 16:07
Տեսախցիկներով հսկողության մասին օրենքի նախագիծը այսօր պետք է քննարկվեր ԱԺ Պաշտպանության և անվտանգության հարցերի մշտական հանձնաժողովի նիստում, սակայն ՆԳՆ փոխնախարար Արփինե Սարգսյանը ներկա չէր և քննարկում չկայացավ։
Հանձնաժողովի նիստի ավարտին «Հայաստան» խմբակցության պատգամավոր Գեղամ Մանուկյանը հիշեցրեց նախագծի մասին և ընդգծեց, որ Արդարադատության նախարարության Անձնական տվյալների պաշտպանության գործակալությունը խիստ բացասական կարծիք էր տվել նախագծին։ Մանուկյանը նաև նշեց, որ հանրության և փորձագիտական համայնքի մոտ նախագծի հետ կապված լուրջ անհանգստություններ կան։
Հանձնաժողովի նախագահ Անդրանիկ Քոչարյանը նշեց, որ դեռ երեք ամիս հնարավորություն կլինի նախագծի շուրջ քննարկումներ կազմակերպելու։
Նշենք, որ նախագծի ընդունմամբ պարտադիր կարգով տեսահսկման սարքեր պետք է տեղադրվեն բանկերում, վարկային կազմակերպություններում, գրավատներում, դեղատներում, արտարժույթի առուվաճառքի՝ առանձնացված մուտք ունեցող կետերում, փոստային կապի օբյեկտներում, հանրային էլեկտրոնային հաղորդակցության ծառայությունների մատուցման կամ նույն ցանցի շահագործման նպատակով օգտագործվող տարածքներում, ուսումնական հաստատություններում, զենքի առևտրով զբաղվող կազմակերպություններում, 100 քմ-ից ավելի մակերես ունեցող առևտրի օբյեկտներում, ինչպես նաև հեղուկ վառելիքի, սեղմված բնական կամ հեղուկացված նավթային կամ ածխաջրածնային գազերի մանրածախ առևտրի կետերում, առևտրի իրականացման վայրերում, մետրոպոլիտենում, ստորգետնյա ավտոկայանատեղերում, 50 քմ-ից ավելի մակերես ունեցող հանրային սննդի օբյեկտներում:
Նշված հաստատություններից բացի տեսախցիկների առկայությունը պարտադիր է լինելու նաև շտապօգնության մեքենաների, ինչպես նաև ավտոբուսների և միկրոավտոբուսների համար։ Այս օբյեկտները պետք է ապահովված լինեն անընդմեջ և բարձր որակի տեսագրություն իրականացնող տեսահսկման համակարգերով՝ օրվա մութ ժամերին նկարահանելու և տեսագրությունն առնվազն 15 օր պահպանելու հնարավորությամբ:
