ՄԱԿ-ի ԱԽ անդամները Ռուսաստանին կոչ են արել դուրս բերել զորքերը Վրաստանից

ՄԱԿ-ի Անվտանգության խորհուրդը նիստ է անցկացրել՝ նվիրված ռուս-վրացական պատերազմի 16-րդ տարելիցին։ Դրա արդյունքներով ԱՄՆ-ը, Ֆրանսիան, Մեծ Բրիտանիան, Ճապոնիան, Սլովենիան, Մալթան, Հունաստանը և Դանիան հանդես են եկել հայտարարությամբ՝ ի պաշտպանություն Վրաստանի տարածքային ամբողջականության, որում կոչ են արել Ռուսաստանին «անհապաղ դուրս բերել» զինված ուժերը վրացական տարածքից և չեղյալ համարել Աբխազիայի և Հարավային Օսիայի տարածաշրջանի անկախության ճանաչումը և ապահովել միջազգային կազմակերպությունների մուտքն այդ շրջաններ, գրում է VOA-ն։

Հայտարարության մեջ ընդգծվում է, որ Ռուսաստանի ներխուժումը Վրաստան «բացահայտեց ռուսական քաղաքականության ավելի ագրեսիվ միտումը իր հարևանների և եվրոպական անվտանգության ճարտարապետության նկատմամբ»։

«Եվս մեկ անգամ դատապարտում ենք Ռուսաստանի մշտական սադրանքները, զորավարժությունների անցկացումը Վրաստանի տարածքային ջրերում և օդային տարածքում, ձեռնարկված քայլերը Օչամչիրայում մշտական ռազմածովային բազա ստեղծելու ուղղությամբ, որն էական վտանգ է ներկայացնում Վրաստանի և ամբողջ Սևծովյան տարածաշրջանի անվտանգության համար, ինչպես նաև Վրաստանի ներքին շրջանները բաժանող փշալարերի և այլ արհեստական պատնեշների տեղադրման գործընթացի վերսկսումը, տեղի բնակչության ապօրինի ձերբակալությունները և առևանգումները, ազատ տեղաշարժի սահմանափակումը կամ անցակետերի մշտական փակումը, էթնիկ վրացիների նկատմամբ խտրականությունը, մայրենի լեզվով կրթության արգելքը և Վրաստանի մշակութային ժառանգության միտումնավոր ոչնչացումը»,- ասվում է հայտարարության մեջ։

Միաժամանակ, ՄԱԿ-ում Ռուսաստանի Դաշնության մշտական ներկայացուցչի առաջին տեղակալ Դմիտրի Պոլյանսկին նույն օրը մամուլի ասուլիս է հրավիրել, որի ընթացքում ՄԱԿ-ի Անվտանգության խորհրդում 2008 թվականի վրաց-ռուսական պատերազմի ամենամյա քննարկումները «մազոխիստական վարժություններ» է անվանել։