14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
2023 թվականին Եվրոպայում շոգից շուրջ 48 հազար մարդ է մահացել
Քաղաքականություն
13.08.2024 | 14:49
2023 թվականի ընթացքում Եվրոպայում շոգից զոհվել է 47,690 մարդ, ասվում է Բարսելոնայի ISGlobal հատազոտության մեջ, որը հրապարակվել է Nature Medicine պաբերականում։ Այսպիսով՝ անցած տարին շոգից մահացությունների թվով դարձել է վերջին տասնամյակում երկրորդը։ Միայն 2022 թվականին է այս ցուցանիշն ավելի բարձր եղել՝ ավելի քան 60,000 մարդ, գրում է DW-ի ռուսական ծառայությունը։
Ըստ գնահատականների՝ Հունաստանում շոգից առնվազն 393 մարդ է մահացել՝ մեկ միլիոն բնակչի հաշվով, որին հաջորդում են Բուլղարիան՝ 229 մահվան դեպքով, Իտալիան՝ 209 մահով և Իսպանիան՝ 175 մահով։ Հետազոտողները պարզել են, որ 2023 թվականին՝ ռեկորդային ամենաշոգ տարում, հարավային Եվրոպան ունեցել է մայրցամաքում մահացության ամենաբարձր ցուցանիշը: Համեմատության համար նշենք, որ Գերմանիայում նման մահերի թիվը գնահատվում է 76՝ մեկ միլիոն բնակչի հաշվով։
«Մեր բացահայտումները ցույց են տալիս, թե ինչպես են հասարակությունները հարմարվել բարձր ջերմաստիճաններին վերջին հարյուրամյակի ընթացքում՝ զգալիորեն նվազեցնելով ջերմության հետ կապված խոցելիությունը և մահացությունը վերջին ամառներում, հատկապես՝ տարեցների շրջանում»,- նշում է հետազոտության առաջատար հեղինակ Էլիզա Գալոն:
Հետազոտության համար վերլուծվել են ջերմաստիճանի ցուցանիշները և մահացության տվյալները 35 եվրոպական երկրներից, ասվում է զեկույցում: Նշված մահվան դեպքերի կեսից ավելին տեղի է ունեցել 2023 թվականի հուլիսի կեսերից մինչև օգոստոս շոգ ալիքների ժամանակ: Օրինակ՝ այդ տարվա հուլիսի 18-ին Սիցիլիայում գրանցվել է 44 աստիճան, իսկ այդ ժամանակ Հունաստանում մոլեգնում էին անտառային հրդեհները, որոնք մի քանի մարդու կյանք են խլել։
Հետազոտության հեղինակներն ընդգծում են, որ նման մահերի թիվը 80 տոկոսով ավելի մեծ կլիներ առանց կառավարության հարմարվողականության միջոցառումների, ինչպիսիք են առողջապահական ոլորտի բարելավումը, վաղ նախազգուշացման համակարգերը, բարելավված հաղորդակցությունը և աշխատանքի անվտանգության առաջընթացը:
