20.07.2026 | 14:36
Գրանցվել է 825 դեպք, որից 327-ը՝ արտակարգ․ Փրկարար ծառայությունն ամփոփում է անցած շաբաթը
Պուտինը ՊՆ-ից պահանջել է «դուրս մղել թշնամուն» Ռուսաստանի տարածքից. նա խորհրդակցություն է հրավիրել
Քաղաքականություն
12.08.2024 | 18:21
ՌԴ նախագահ Վլադիմիր Պուտինը հայտարարել է, որ Ռուսաստանի պաշտպանության նախարարության հիմնական խնդիրն է՝ «թշնամուն դուրս մղել երկրի տարածքներից և ապահովել սահմանների հուսալի փակումը»։ Կրեմլի մամուլի ծառայության տեղեկացմամբ՝ այս մասին նա ասել է Ուկրաինային սահմանակից շրջաններում տիրող իրավիճակի վերաբերյալ հանդիպմանը, փոխանցում է Մեդուզան։
«Գլխավոր խնդիրը, անշուշտ, դրված է ՊՆ-ի առջև՝ դուրս մղել, քշել թշնամուն մեր տարածքներից և սահմանապահ ծառայության հետ միասին ապահովել պետական սահմանի հուսալի փակումը։ ԱԴԾ-ն Ռոսգվարդիայի հետ միասին պետք է ապահովի հակաահաբեկչական իրավիճակը և արդյունավետ պայքարը հակառակորդի դիվերսիոն-հետախուզական խմբերի դեմ։ Տեղի ունեցող իրադարձություններին պետք է գնահատական տրվի անվերապահորեն։ Դա կկատարվի։ Բայց հիմա գլխավորը հրատապ խնդիրների լուծումն է, որոնք ի հայտ են գալիս տվյալ պահին և հիմնված են իրավիճակի զարգացման կանխատեսումների վրա»,- ասել է Պուտինը։
Ըստ ՌԴ նախագահի՝ Կիևն իր «արևմտյան տերերի» օգնությամբ ձգտում է «ապագայում բարելավել իր բանակցային դիրքերը»՝ հարձակվելով ռուսական տարածքի վրա։
«Բայց ի՞նչ բանակցությունների մասին կարելի է խոսել այն մարդկանց հետ, ովքեր անխտիր հարձակվում են քաղաքացիական անձանց, քաղաքացիական ենթակառուցվածքների վրա կամ փորձում են վտանգ ստեղծել միջուկային էներգիայի օբյեկտների համար: Ինչի՞ մասին կարելի է ընդհանրապես խոսել նրանց հետ»,- հայտարարել է Պուտինը։
Օգոստոսի 6-ին ուկրաինական զորքերը ներխուժել են Կուրսկի շրջանի տարածք։ Այդ ժամանակից ի վեր այնտեղ մարտեր են ընթանում։ Հաղորդվում է, որ օգոստոսի 11-ի գիշերն ուկրաինական ուժերը մտել են Կուրսկի մեկ այլ՝ Բելովսկի շրջան: Այն գտնվում է Սուջայից հարավ, որտեղից սկսվել է ուկրաինական ուժերի ճեղքումը դեպի ռուսական տարածք։ Մի կողմից Բելովսկի շրջանը սահմանակից է Ուկրաինային, մյուս կողմից՝ Բելգորոդի մարզին։
