Փաշինյանն այցելել է Երևանին միլիոնավոր դրամների տնկիներ մատակարարած ընկերություն․ ՏԵՍԱՆՅՈՒԹ

Նիկոլ Փաշինյանը Տավուշի մարզ կատարած աշխատանքային այցի շրջանակում շրջայց է կատարել «Բերրի վորլդ» ՍՊԸ-ի տնկարան։

Factor.am-ը հայտնել էր, որ Երևանում թեղիների հատումից հետո տնկվող ծառերի մատակարարը «Բերրի Վորլդ» ՍՊԸ-ն է։ Երևանի քաղաքապետարանն այս ընկերության հետ յոթ պայմանագիր է կնքել, որոնց ընդհանուր արժեքը կազմում է 198 մլն 632 հազար դրամ։ Պետական գնումների համակարգի ուսումնասիրությունից Factor TV-ն բացահայտում է, որ այս բազմամիլիոնանոց գործարքների մեծ մասն իրականացվել է 2023 թվականին։ Միայն 82 մլն դրամ արժեցող պայմանագիրն է կնքվել այս տարի։ Նույն աղբյուրի համաձայն՝ քաղաքապետարանը ծառայությունները ձեռք է բերել էլեկտրոնային աճուրդի միջոցով։

Այս գնման գործարքում ուշագրավ է այն հանգամանքը, որ այն հայտնվել է Հակակոռուպցիոն կոմիտեի ուշադրության կենտրոնում։ Իրավապահ կառույց են հրավիրել Երևանի կանաչապատման ՀՈԱԿ-ի աշխատակիցները և տնկիներ մատակարարելու մրցույթին գրանցված երեք ընկերության ներկայացուցիչները։ Բանն այն է, որ նրանք նախամրցութային փուլում առաջարկել են մինչև 10 անգամ բարձր արժեքներ, իսկ հետո հրաժարվել մասնակցել աճուրդին, ինչի հետևանքով հաղթող է ճանաչվել «Բերրի վորլդ» ՍՊԸ-ն։ Մի քանի ամիս անց էլ` Սասուն Խաչատրյանի ղեկավարած կոմիտեն խուսափել է պատասխանել Factor.am-ի հարցմանը, թե ինչու են նշյալ անձինք հրավիրվել կոմիտե։

«Բերրի վորլդ» ՍՊԸ-ի սեփականատեր Դավիթ Աբովյանը, որն այսօր դիմավորում էր Փաշինյանին, Տիգրան Ավինյանի հոր՝ Արմեն Ավինյանի հետ համագործակցել են «Երևան պարկի» աշխատանքներում։ Տիգրան Ավինյանը այս փաստը չի համարում կոռուպցիոն ռիսկ։

Նարեկ Կիրակոսյան